Buscando alternativa pa reemplasa klem den Aruparking

ORANJESTAD – Gobierno ta buscando alternativanan pa reemplasa klem den Aruparking. Un di e puntonan cu Minister President Mike Eman a trece dilanti durante e conferencia di prensa ofreci hunto cu Aruparking, ta esun di klem. Gobierno a bisa cu e tin comprension y atencion total pa sentimento di publico den e asunto aki. “Klem a bira e visualisacion negativo di henter e parking,” asina mes,   Eman a añadi cu no mester lubida cu “tur caminda cu tin un regulacion, mester tin tambe un sancion, si no e no ta funciona.” Parkeo paga ta un concepto internacional, pero asina mes, na Aruba su introduccion a hay’e afecta.

Un comision di Aruparking y Arubus a bay New York pa reuni cu autoridad di parkeo di e ciudad grandi aki pa wak con nan ta atende e aspecto aki di nan servicio. Ey a conoce cu nan tambe a y ta pasando den un proceso di test diferente maneho. Na New York a kita klem pa na su luga pone boet, despues cobramento di boet a bay dificil y awo nan ta haciendo un combinacion di klem y boet. 

“Nos deseo ta keda pa elimina e klem completo, pero esey no kier men cu no lo tin sancion,” asina   Eman a declara durante e conferencia cu a tuma luga den sala di reunion di edificio Gobierno. E mandatario a indica cu su Ministerio hunto cu Aruparking y Arubus ta keda traha riba e punto aki. “Ta pensando riba diferente posibilidad, mester wak tambe nan funcionalidad,” asina Eman a indica. Foto ta di archivo di NoticiaCla.com durante demonstracion di un parkeerwachter dunado demonstracion di con ta pone klem.