Turistanan no ta baha di tram den di dos mitar di Caya Grandi

ORANJESTAD - Gobierno ta buscando manera pa soluciona e problema di tram den Caya Libertador Betico Croes, conoci como Caya Grandi. Prome Minister Mike Eman recientemente a admiti cu tin problema pa haya turistanan baha for di tram ora cu nan haci e recorido. Tabata durante e conferencia di prensa recientemente pa presenta cambionan nobo, a afirma cu turistanan no ta interesa pa baha for di e tram, unabes cu esaki yega y pasa e mitar di Caya Grandi pa final. Esaki no obstante cu tin actividad, e turistanan no ta interesa pa baha. Eman mes a experencia esaki personalmente y a cuminsa puntra kico por ta e motibo. 

TURISTANAN NO TA BAHA

Pa basta tempo comerciantenan tabata critica cu turistanan por bien ta subi e tram, pero den Caya Grandi nan no ta baha, sino ta bin simplemente pa e 'trip'. Mes momento ta confirma si cu e turistanan ta baha den e prome parti di Caya Grandi. "Pero asina cu e tram yega mitar caminda, na altura di La Moderna, nan no ta baha. Porta nan ta kere cu e distancia ta mucho largo pa cana bek, of cu no tin actividad" Eman a bisa. Anto esaki ta no obstante cu recientemente tabatin actividad final di Caya Grandi cu e mercado di Santa Rosa. E hecho aki a sorprende Eman personalmente y awor ta mirando kico por haci pa e turistanan toch haya interes pa baha den full e caya y no solamente e prome mitar.