Gobierno no ta kere den moratorium pa tiendanan pafo di Caya Grandi

ORANJESTAD - Gobierno no ta mucho interesa pa implementa un 'moratorium' pa evita cu tiendanan ta sali for di Caya Libertador Betico Croes, conoci como Caya Grandi. Tabata un peticion di e grupo di comerciante di e asociacion ODA (Oranjestad Downtown Association) pa implementa e 'moratorium' aki. Riba pregunta di NoticiaCla.com, prome minister Mike Eman a bisa cu si haci esey, 'e ta kita derecho di consumidor pa cierto servicio'. Un bishita pa Caya Grandi no mester ta solamente pa cumpra algo, sino pa experencia algo unico, segun e prome mandatario. Dialuna anochi mientrastanto ta habri Caya Grandi pa trafico atrobe pa un periodo di un siman y mei. 

TIENDANAN BON SURTI

Eman a sigura cu tin un cantidad di tienda bon surti tur caminda. "Tin tienda local den tur region (na Aruba) cerca di cas. Esey tin su impacto" Eman a bisa. E ta menciona tiendanan grandi di hendenan local cu ta ofrece tur cos y di calidad. Esey por ta algo bon. Como ehempel Eman ta duna di un persona cu 'a lubida di cumpra un regalo pa un hende, y por haci esaki den su propio bario sin tin di bin te Playa. E ta parti di e oportunidad di competencia cu mester tin. "Un bishita pa Caya Grandi mester ta un experiencia asina unico, cu ta nifica cu no ta bin djies pa cumpra un producto. Si lagu'e solamente pa esey, competencia ta mucho grandi" Eman a sigui bisa. Ademas e ta kita derecho di consumidor pa cierto servicio. Como tal, no ta kere cu lo bay impone un moratorium manera cu e grupo di comerciante a pidi.