ATIA asombra cu accion di douane den luna di december

ORANJESTAD - E gremio comercial ATIA a mustra su desaprobacion diabierna pa e e forma con douane ta actuando. Segun e gremio den un comunicado ta mustra cu na mas cu un ocasion ATIA como e voz di comercio, ta mira accionan di Douane ta afecta e ader economico di nos pais causando dañonan enorme na comercio y consecuentemente na e consumidor.

COMPRENSION

ATIA tin comprension pa derecho di cualkier trahador, pero ora un departamento manera Douane, ariba cual comercio ta depende pa ricibi producto pa su sobreviviencia,  stanka e proceso aki ta inacceptabel. Muy particular den e temporado aki cu hopi comerciante ta depende pa nan sobreviviencia di luna di December,  un accion asina por ta financieramenta mortal pa comercio.

CONTROL ESTRICTO

Ya caba Douane ta implementando un proceso di control estricto special den luna di December cu ta causando demora pa comercio ricibi producto. Accionnan cu ta afecta henter nos comunidad y muy particular comercio ta wordo condena totalmente pa ATIA. 

DIALOGO

ATIA na varios ocasion ta trata pa medio di dialogo,  jega na compromiso y ta kere cu mester por tin solucion pa tur diferencia di opinion. Laga tercer partido sufri pa logra un meta,  ta algo cu no por y ta inacceptabel. ATIA lo sigui e proceso y accionan di cerca y lo tuma e posicion necesario na defensa di comercio y e consumidor.