Refunjol: 'Mi ta sintimi un Arubiano hopi orguyoso'

ORANJESTAD - 'Mi ta sintimi un Arubiano hopi orguyoso'. Un Gobernador visiblemente satisfecho y orguyoso, y mas aun, agradecido pa tur loke el a pasa aden e ultimo 12 añanan y 8 luna como Gobernador, y prome cu esey, su tempo trahando den sector publico. Na ocasion di e recepcion di despedida di Gobernador saliente Fredis Refujol, ofreci pa gabinete Mike Eman II, tanto prome minister Mike Eman como Gobernador Refunjol a dirigi nan mes na e publico. Pero tabata Gobernador su palabranan cu a resona y percura pa un aplauso hopi largo na final. "Palabra ta di sobra", e maestro di ceremonia Cheryl Buckley a remarca na final. 

GOBERNADOR

E anochi a cuminsa cu entrega di e cd di e himno di Aruba manera cu productor hoben Jonathan Vieira a produci mas prome e aña aki cu un grupo di artista di Aruba na New York. Su mayornan tabatin e honor di a entrega e cd y un cuadro na Gobernador Refunjol. Despues Gobernador Refunjol a repasa su carera profesional y a confesa cu su periodo como gobernante (minister) tabata esun unda cu mas el a siña y a habri su wowonan pa tur loke el a siña y pasa aden. Su periodo di Gobernador tambe tabata sigur uno cu hopi reto unda cu, manera e mes a confirma, no semper tabata facil, a gradici Gabinete Mike Eman pa a dune e espacio pa e por a fungi como Gobernador. "Boso tin boso dilanti un homber hopi orguyoso di ta Rubiano", Gobernador a bisa. Repasando su biahenan durante su carera, el a sigura un y tur cu Aruba ta bendiciona y cu tin'e hopi bon, aunke cu tin hopi reto. El a priminti cu e lo sigui duna conseho na gobierno unda cu mester. Prome minister Mike Eman a gradici Gobernador pa su labor, y aunke e no tabata facil tin biaha, a admiti cu durante su welga di hamber, tabata Gobernador cu a bise pa para e welga di hamber y cu awa na wowo (tanto Gobernador y Eman), nan a brasa otro y Eman a termina su welga. 

E RECEPCION

E anochi tabata uno ameno unda cu un grupo di invitado a disfruta di musica, cuminda, posibilidad di intercambia cu Gobernador, manera cu a wordo bisa, chens pa 'network'. Un bunita video repasando e bida di Gobernador Refunjol, a ilustra e persona completo, tanto den funcion como pafo di funcion, unda cu varios persona clave den su bida, a relata nan experiencia cu Gobernador, pintando asina un cuadro mas humano di e persona cu hopi a bin ta respeta como nos cabes di gobierno pa e ultimo 8 aña y 8 luna. NoticiaCla.com kier a gradici Gobernador pa su cooperacion y amistad di cerca!. Danki!.