Edith Koolman: 'Dump a yena y nos buchi a yena!'

ORANJESTAD - "Dump a yena y nos buchi a yena!" Esey tabata un grito di auxilio di presidente di Fundacion Parkietenbos  Edith Koolman durante un conferencia di prensa diahuebs mainta. Segun Koolman, e tabata presente mas bien  como un hende muher y ama di cas cu conoce y ta compronde e sufrimento di specialmente e mama nan y amanan di cas di e barionan Parkietenbos, Simeon Antonio, Buena Vista, Wayaca y Mahuma". Fuera di Koolman, Aldrich Croes y Milton Ponson sr, (ambos tambe habitante di Parkietenbos), tambe a duna nan splicacion.

DIALOGO 

Segun Koolman, nan a scoge e caminda di dialogo directo cu Gobierno ja pa algun luna caba, pa motibo cu simplemente mester ta comprendibel pa cualkier ser humano con e situacion di e Dump a bira y nos no kier a perde tempo cu nada otro cu papia directo cu autoridad masha alto pa desicionnan firme wordo tuma. "Esaki ta loke nos a trese dilanti na nos gobernante nan; Dump a crece y bira un monster y ta un bista mahos sin ningun clase di seguridad, medida y inspeccion riba y rond di dje. Dump ta un peliger pa cu salud di cada un cu ta traha ey riba y tambe pa tur esnan cu ta biba den e bario nan anteriormente menciona. Dump a bay over y nos tur sa cu tur dia tin candela sea cu e ta wordu sendi of e ta sende di su mes pero e candela tey tur dia y hunto cu e huma y contaminando nos aire, mescos tambe pulmon di nos mucha nan, nos grandi nan y tur e demas famia nan den vicendario directo". 

NO POR SIGUI MAS

Segun Koolman, esaki en absoluto no por continua mas y nos no ta accepta mas tampoco. Durante algun tempo berdad cu e Planta anterior cual a inverti miyones, e bario a haya un alivio grandi, sinembargo desde cu e planta aki ta for di funcion e Dump a crece bira un monster mahos pa bista di hende y un mensasa pa salud di e habitante nan y contaminacion di nos laman. "Cu otro palabra e ta un bom cu un momento pa otro por causa un of otro disaster".

SUFRIMENTO DI HABITANTENAN

E anja aki habitantenan den e barionan ja menciona a sufri mas cu nunca pa motibo di e clima instabiel y cambio di biento, kimamento di e insolacion di waya nan di koper, kimamento di tire, holor malo di bestia nan morto, cuminda putri y tambe di candela cu segun nan ta bisa cu ta pega su so. Habitante nan mester sera cas, y tin varios cu hasta ta haña nan ta bandona cas pa algun ora of dia, mucha nan no por hunga pafor, bon no por colga bo paña nan laba na cabuya, no por haci cas limpi drechi, anochi nos hende nan ta sofoca den nan soño, nos tin varios caso di mucha nan cu awor tin asma, habitante nan cu a haya y ta keda hanja uitslag riba nan cuero, tin grandi nan cu tin cu wordo hiba otro bario na famia of conocir nan pa bay drumi.

"Nos no ta accepta tur e molester nan aki mas y difinitivamente pa e salud y bienestar di no solamente e bario nan anteriormente menciona, sino pa nos dushi isla Aruba e Dump aki ta jen y no tin lugar pa mas sushi" Koolman a sigui bisa. 

SITUACION CU SERLIMAR

"Gobierno a enfatisa na nos, cu e solucion no lo bay a costo di ningun empleado di Serlimar y tampoco na excistencia di Serlimar".Pero locual segun Koolman a haci nan mas contento, ta di tende cu e Dump lo wordu sera manera cu nan a priminti na nan. “ Dump a yena, y habitante di Parkietenbos, Simeon Antonio, Buena Vista, Wayaka, Mahuma y besindario nan buchi a yena" Koolman a finalisa bisando.