Flexibilidad cu parkeermeters mucho poco y mucho laat!

ORANJESTAD - "E anuncio pa 'flexibilisa' e maneho di parkeermeter (manera anuncia na comienso di november), ta mucho poco y mucho laat!". Asina Oranjestad Downtown Association (ODA) ta bisa gobierno den un carta fecha apenas un dia despues di e anuncio, esta 9 di november. E carta, cu NoticiaCla.com a pone su man ariba, ta urgi gobierno pa actua pa evita un cierre total di caya grandi. Y pa soluciona esaki, nan ta pidi pa tuma 4 paso urgente. 

CONTENIDO DI E CARTA

E grupo di comerciante di Caya Grandi, ta cuminsa e carta na bisa cu mientras cu prome minister Eman a haci e anuncio di e flexibilisacion (8 november ultimo), nan ta manda e carta aki toch. Ta recorda e mandatario cu a manda no menos cu 4 carta oficial y a reuni repetidamente cu Eman y ex minister Oduber riba e crisis cu e comerciantenan ta confronta. "E hecho ta cu bo cambionan di 'flexibilidad' ta mucho poco y mucho laat. E daño ta haci caba!". Ta haci mencion cu desde cu e grupo a manda nan carta ultimo biaha, cu mas negoshi a cera, di cual esun mas notable ta The Sting.Y pa evita mas cierre, ta urgi pa tuma cuater medida.

MEDIDANAN SUGERI

Entre e medidanan sugeri, ta pidi pa a. elimina e parkeermeter, b. elimina e tram y habri Caya Grandi pa trafico, c. Introduci un moratorium riba negoshi pafo di Caya Grandi, y d. Introduci incentivo fiscal pa atrae mas negoshi bek pa Caya Grandi y pa mantene esnan cu tey. 

TEMPO

"Nos no tin e luho mas di tempo, y nos mester di accion inmediato" e carta ta sigui bisa. Nan tabatin intencion di bay prensa cu e carta aki despues pero e carta ya caba a cay den poder di e portal aki. E carta ta firma pa cuater comerciante cu ta forma parti di e asosacion. A puntra nan pa comentario pero nan no tabata disponibel aworaki y a priminti di reacciona dentro di poco.