Doñonan di restaurant +297 a recobra nan libertad

ORANJESTAD - Un siman y mei despues cu polis a detene un grupo di persona, y entre nan, e doñonan di e restaurant +297 despues di un intercambio no mucho agradabel, tur tres persona (doño) a recobra nan libertad diaranson merdia. Nan abogado Marije Vaders a confirma esaki pa NoticiaCla.com diaranson atardi laat. "Nan a sali bou di condicion di un fiansa di 5 mil florin, pero sin otro condicion" e abogado a sigura e portal aki. "Nan ta hopi contento y por ta cu nan famia atrobe" e abogado basa for di Corsou a bisa. 

E SUSESO 

Manera ta conoci, riba e diadomingo marduga 4 di december durante un control rutinario, algun polis a bishita e restaurant ora cu nan a tuma nota di un situacion no corecto y a bay busca drechi mas di aserca. Loke a sosode despues tabata un 'intercambio entre e polisnan y un grupo di persona den parti di e lounge di e facilidad. Entre nan tabatin e doñonan cu despues di intercambio cu polis, a keda deteni. Loke a sosode exactamente ta wordo investiga actualmente pa autoridad. Tin cantidad di material di video cu a aparece, declaracionan haci, cu a bira parti di e investigacion. Esaki tin cu determina kico exactamente a sosode y ken tur ta papia berdad. 

PRIORIDAD 

Pa e abogado, su prioridad tabata pa recobra libertad di su tres clientenan, e  doñonan respectivamente. E no tabata un trabou facil, pero despues di intervencion y investigacion, e abogado a logra convence autoridad pa laga su clientenan recobra nan libertad. E caso ta keda bou di investigacion.