Insel Air cu extra buelo pa pasaheronan for di Surnam pa Aruba

ORANJESTAD - Pendiente e buelo di Corsou pa Paramaribo diasabra anochi, Insel Air ta preparando pa un buelo extra diadomingo proximo. Ta wak con e buelo di diasabra ta bay, pa por continua planificacion di e proximo buelonan segun CEO di Insel Air Aruba Frederick Nuboer na NoticiaCla.com diasabra atardi. E buelo cu mester a bolbe Corsou diabierna anochi laat, a bolbe trece complicacion pa e compania cu a pone cu mester a ahusta nan schedule pa trece e pasaheronan cu a keda pega na Surnam bek Corsou y Aruba. Den combersacion cu Nuboer, e la confirma cu tin un buelo extra di Surnam pa Aruba diadomingo merdia 3'or. "Nos representantenan na Surnam lo coordina cu nos pasaheronan pa cambio di e itinerario" Nuboer a sigui bisa. E la mustra tambe cu e pasaheronan di Insel Air por tuma contacto cu representantenan di e aerolinja na telefon 597 710 5750. "Insel Air ta disculpa su mes pa e inconveniencia cu e retraso di nos buelo por a ocasiona", Nuboer a sigui bisa. 

Tabata diabierna anocbi ora cu e avion di Insel Air cu a sali pa Surnam, a bolbe Corsou sin aterisa na Surnam. Den combersacion cu e CEO di Insel Air Aruba Frederick Nuboer, e la confirma cu e capitan, durante su trayecto den espacio di Venezuela, a wordo notifica pa toren di Maiquetia cu nan a check cu Surnam y cu nan a wordo informa cu tin problema cu e number di buelo, siendo uno existente of cu ta trata di un extra buelo. Esaki a pone cu e capitan a dicidi di bira e avion bek y aterisa na Corsou.

E capitan tabata bulando riba Islas Aves (pariba di Bonaire) rumbo pa Paramaribo ora cu e capitan, hayando e informacion di Maiquetia, cu e posibilidad cu Surnam por bira e avion bek, mes a dicidi di bira e avion bek pa Corsou. Mientrastanto na Corsou e pasaheronan tur a baha for di e avion, y e buelo ta cancela pa e anochi.