Minister Juan David Yrausquin a entrega su retiro

ORANJESTAD - Diabierna mainta trempan Minister di Finansas, Juan David Yrausquin, a entrega su carta di retiro na Gobernador di Aruba. Motibo principal di su retiro ta "e abuso increibel di poder cu a wordo eherci riba e Gobierno di Aruba den e ultimo simannan pa e Gobierno Hulandes y cual abuso di poder lamentablemente a wordo sosteni pa Gobernador". Den su carta di retiro dirigi na Gobernador, Juan David Yrausquin ta subraya cu e abuso di poder aki a causa y ainda ta causando daño serio na e credibilidad y finanzas publico di nos Pais pa cual e no por sigui carga responsabilidad.Mirando cu segun nos Constitucion ta e mandatario ta esun cu ta carga e responsabilidad ministerial pa e actonan di Gobernador, y den esaki ta trata actonan di Gobernador cu ta cay bou di su responsabilidad ministerial, cual ta finansas publico, Juan David Yrausquin, como Minister di Finansas ta saca su propio conclusion y ta asumi responsabilidad politico pa e abuso di poder cometi pa Gobernador.Juan David Yrausquin a resalta den su carta cu “responsabilidad y autoridad ta bay man den man” y ta considera esaki un principio basico di maneho. Sinembargo, e mandatario encarga cu finansas a sigui remarca cu, den e ultimo simannan e tabata testigo di con Gobierno Hulandes, bou capa di Gobernador a eherce autoridad riba nos Pais sin tin e responsabilidad legal, constitucional, ni financiero na momento cu tin consecuencianan pa nos Pais. Segun Juan David Yrausquin, e Pueblo Arubano, e Parlamento cu e Pueblo a eligi y e Gobierno cu e Parlamento aki ta sostene a wordo chantahia y humilia den un forma nunca antes bisto, mientras institutonan Arubano a sostene e actonan repudiabel aki. E mandatario ta considera esaki un acto cobarde di parti di e institutonan Arubano en cuestion.Apesar di tur esaki, e mandatario a expresa den su carta di retiro cu e tabata un honor p’e di por a sirbi su Pais y pueblo den e ultimo 9 luna, cual tarea ela eherce cu devocion total, compromiso y conforme e huramentacion cu ela haci dilanti Gobernador.E mandatario a termina su carta cu un apelacion na Gobernador pa asumi e responsabilidad pa cual e tambe a hura lealtad na dje, cual ta e Statuut di Reino y nos Constitucion, y pa e firma e presupuesto aproba pa e Parlamento cu Pueblo Arubano a eligi democraticamente y asina evita daño ireversibel na nos Pais y nos finanzas publico; enfatisando di ta spera “cu sano huicio prevalece”