DIMAS NO TA PORDONA MAS!

ORANJESTAD - Minister di  Integracion a informa cu tin cambio den su maneho di admision di personanan stranhero. DIMAS desde 1 di juni 2014, pa e motibo aki, no ta tuma ningun peticion mas pa un permiso di estadia a base di e pardon special. E peticionnan cu tawata den tramite caba, lo ser atendi a base di e maneho cu tawata aplicabel ora di e fecha di somete e aplicacion pa tal. Na aña 2010 Gobierno di Aruba a tuma e decision pa implementa un maneho di gracia como parti di un maneho di admision cu ta mas humanitario y teniendo na consideracion cu a anuncia cu lo aboli e maneho Swiss for di ley di admision.A evalua na prome instancia si lo por haci un trayecto mescos cu na Corsou, unda a implementa un proyecto di pardon general (of gracia) cu a haya e nomber di “Brookstower”. No a opta pa haci tal finalmente. A denomina cual categorianan lo por bin remarca pa un permiso duna a base di e areglo di pardon special. E indole di e maneho di pardon special tawata uno di caracter temporario. E maneho temporario di “pardon special” e.o. a duna oportunidad na turesnan – cu a haci intento(nan) den pasado pa legalisa nan estadia na Aruba y sinembargo pa un of otro motibo a permanece pa un periodo di minimo5 aña of mas na Aruba di cual un periodo sin un titulo valido di estadia, pa regla nan status di estadia den caso cu nan ta na Aruba ainda. E personanan por a acudi na DIMAS y por a aplica pa un permiso di estadia temporario a base di e maneho di pardon special. E permiso di estadia temporario conoci como “SPR” y tawata tin su condicionnan y tambe su limitacionnan acopla na dje.

E intencion di e SPR ta pa e persona tawata tin e espacio pa atende tur e procesonan necesario y tambe acumula tur documento rekeri, pa asina e por drenta e circuito laboral. Di es manera aki e persona ta sali for di un circuito ilegal - y lo sigui contribui na e circuito legal.

Considerando cu a brinda e ultimo 4 añanan suficiente espacio na esnan indocumenta por a sali for di e circuito ilegal y sigui den e trayecto regular, e evaluacion y consehonan ricibi pa cu e maneho aki, Minister di Desaroyo Teritorial, Infrastructura y Integracion, dia 26 di mei ultimo a tuma e decision pa pone un fin na e maneho di pardon special aki, cual tawata desde un inicio tabata uno di un indole temporario.