KPA ta clarifica informe riba incautacion di matanan di Cannabis

ORANJESTAD - Cuerpo Policial a rectifica e informacion inicial emiti un dia prome riba plantacion di marihuana haya na un cas na Noord. Inicialmente e relato manda ta bisa cu a haya droga na cas di un abogado. Esey a resulta di no ta corecto. Den un comunicado diamars merdia, KPA ta rectifica mustrando cu 'a tuma nota cu, especialmente den social media, a lanta un polemica relaciona cu e ultimo informe di Cuerpo Policial Aruba. " Mediante e informe aki nos a notifica pueblo di un logro di nos coleganan di districto di Noord, unda a bin haya un plantacion basta sofistica di mata di Marihuana. Den dicho informe nos a menciona cu ta trata di un cas di un abogado. Nos kier clarifica cu den e caso aki ta trata di un yiu di un abogado cu lo ta biba na e cas menciona y cu lo a trata di nenga e entrada di polis, inicialmente" e comunicado ta sigui bisa. Ademas Cuerpo Policial no a menciona ningun nomber di ningun persona.  "Mirando cu ta trata di un investigacion activo nos no por duna mas informacion na e momentonan aki" e comunicado ta finalisa bisando.