Comision Ys cu conseho riba InselAir na gobierno awe

WILLEMSTAD/ORANJESTAD - "'Un scenario sin InselAir lo nifica consecuencianan serio pa conectividad aereo pa y fo'i Corsou' ". Asina e conseho di e comision di sabio (Comision Ys) lo raporta na gobierno di Corsou awe segun matutino Extra. E comision Ys a entrega nan rapport riba pasonan cu por of no por tuma den caso di posibel intermediacion di gobierno di Corsou pa cu Insel Air international (y consecuentemente InselAir Aruba).  Segun e matutino, ta intencion pa e comision tene un presentacion awe pa e coalision pa despues e team ministerial bay Parlamento cu e rapport. Nan ta yama e comision e 'team di sabionan' forma pa hendenan manera ex prome minister Etienne Ys, ex presidente di Aqualectra Anton Casperson y un experto di aviacion di Inglaterra. E resultado di e comision mientrastanto ta importante pa e situacion di InselAir Aruba, manera cu su abogado Arlene Ellis a confirma den corte. "E por bira e lifeline di e compania". Pues Aruba lo mira e resultado aki cu hopi interes. 

CONSEHO DI E COMISION 

Loke cu e rapport ta conclui, ta cu 'un scenario sin InselAir lo nifica consecuencianan serio pa conectividad aereo pa y fo'i Corsou'. Den un scenario asina mester cuminsa biaha pa Aruba via Miami, y cu trafico pa y fo'i Bonaire lo cay na un minimo y depende totalmente di Divi Air, segun e expertonan. Trafico aereo pa y fo'i St Maarten lo keda reduci na un minimo nan ta conclui tambe. E matutino ta mustra cu e comision Ys lo a explora eventual interes di e companianan aereo di afo bin establece nan mes na Corsou pa yena un eventual bashi cu InselAir su caida lo laga. Pero esey no ta asina asina ta resolve, pero lo por tarda henter un aña prome cu esaki keda cla. 

SITUACION PA ARUBA

Manera cu NoticiaCla.com den forma di primicia a raporta dialuna caba, e trahadonan di InselAir Aruba a hiba nan doño di trabou corte pa forsa e compania paga e loke e debe na traspaso di belasting y pensioen. Mientras cu abogado di e compania a sigura e portal aki cu esey no mester nifica kiebro di e compania local, fuentenan cerca di e proceso ta bisa otro y ta mustra cu e por nifica netamente esey, fin di InselAir Aruba. Diaranson hues ta dicta sentencia, y e ora lo haya sa mas. Tin e pensamento cu hues lo no permiti (pa interes general) crea un situacion cu por nifica fin di e compania, pero con cu para, e bala a cuminsa core cu ta pone tur luz riba e compania y cu e por haci su intento pa resolve su problemanan financiero, mas dificil ainda. Foto cortesia CuracaoChronicle.