No tin mas accion di sala di operacion di hospital

ORANJESTAD - "Tur empleado ta na trabou. E walk-out tabata un rato, pero e disputa ta regla", asina vocero di hospital Dr. Horacio E. Oduber Charlaine Alexander-Huntington a informa. E inconveniencia pa motibo di e accion a keda limita, pasobra e Hunta di Directiva di Hospital a sinta na mesa mesora cu sindicato pa soluciona e mal comprendemento.

Dialuna mainta mes a tuma luga un reunion entre e Hunta di Directiva di Hospital y sindicato ABV, den cual a acorda cu e Cluster Manager di Operatie Kamer lo reuni cu e "Operatiekamer roosterplanner" pa pasa dor di e puntonan di cual e sindicato hunto cu e empleadonan di sala di operacion no ta di acuerdo cu ne. Un ke otro tin di haber cu cambionan haci den e rooster di trabou di e personal di sala di operacion pa loke ta dianan di fiesta. 

Hunta di Directiva di Hospital a haci un apelacion riba e Cluster Manager pa sigura cu ta yega na un rooster cu ta cumbini maneho di Hospital, ta cumbini pashent, pero cu ta cumbini e empleadonan tambe. Di e forma aki por tin harmonia y ta eherce e trabou cu satisfaccion. No ta spera mas accion awor, comokiera cu a acorda cu e reunion lo tuma luga pronto, pa evita mas inconveniencia pa e nursenan y personal di sosten den sala di operacion na Hospital.