Partidonan politico cu mesun color a crea prome polemica

ORANJESTAD - Cu anuncio di e partido politico nobo Movimiento Arubano Soberano (MAS) dialuna, a cuminsa mesora e prome controversia/polemica di eleccion: e uzo di color(nan) di e partido cu ta similar na esun di e partido di Otmar Oduber (Pueblo Orguyoso y Respeta (POR) cu a keda formalisa apenas un dia prome. E colornan cora y blauw scur ta e mesunan cu (MAS) y (POR) ta uzando. Mes momento a sigura cu e blauw cu partido UPP ta uzando, ta mas cla pues segun Conseho Supremo Electoral, no ta un problema. 

HENRIQUEZ vs ODUBER

Segun e lider di MAS Holmo Henriquez, nan tabata prome cu e colornan y a manda e mensahe pa Oduber: "Mi ta sugeri nan, pa haci un otro escohencia" Henriquez a manda bisa Oduber. Oduber mientrastanto a bisa cu e no ta reacciona riba otro partido, aunke a bisa NoticiaCla.com si brevemente:"Logo y color no ta prioridad di Aruba. Nos ta laga otronan bringa y papia di logo", mustrando cu su partido ta enfoca awor riba programa di partido. 

KEN TABATA PROME

Bek pa Henriquez, ela referi na declaraciionan anterior di Oduber cu a mustra cu na november ainda a bisa cu 'e colornan y nomber ainda mester wordo determina. "Hopi bisto, duidelijk ken tin e color!" Henriquez a bisa. E ta considera e loke cu Oduber a haci, como algo pura lanta, cu ta ilustra 'claramente falta di preparacion, debilidad". Y loke cu Oduber a haci pa loke ta e color, Henriquez no ta considera corecto. "MI ta suplica nan pa haci un otro escohencia" Henriquez a manda bisa Oduber. Oduber na su turno a mustra cu su plataforma a wordo lanta dilanti notario y ta cumpli cu tur regla cu tin. "Cu mi sa, ta prome minister ta dicidi kico ta colornan pa proximo eleccion" Oduber ta finalisa bisando e portal aki.