M.A.S. lo laga pueblo recupera e poder soberano bek

ORANJESTAD - E partido politico Movimiento Arubano Soberano a keda presenta oficialmente na prensa dialuna.  Su lider Holmo Henriquez ta mustra cu e partido no ta uno nobo, mirando cu el a wordo funda por medio di akto notarial na September 17, 2015 y ta registra kaba na Kamer van Koophandel pero tambe na Electorale Raad for di comienso di aña y aña pasa respectivamente. "Awe ta solamente e formalidad di e registro ta wordo hasi publicamente cu e presencia di Sr. Hubert Maduro di Electorale Raad" Henriquez a bisa. E partido lo presenta algun di su miembronan na comienso di otro aña segun su lider. 

COMPARACION 

Segun su lider, e partido lo pone fin na e.o. dunamento di permiso sin procedura corecto. Nan ta duna vergunning na companianan sin cu pasa e proceduranan legal prome. "Eseynan ta fechorianan cu nos partido MAS lo bay pone un final na dje". E no a keda sin referi na e partido di Otmar Oduber y haci comparacion cu e gobierno actual. "E Forsa Nobo no ta nada nobo di locual ta exisiti den gobierno y parlamento kaba. Nan ta keda cu e mesun mala maña. Un tiger no ta perde su strepinan" Henriquez a bisa. E lider ta sigura cu Movimiento Arubano Soberano no ta un partido cu a lanta di awe pa manjan sin e debido preparacion. "MAS no ta manera otro partidonan cu a core lanta den pura y ora cu nan a realisa cu nan no por forma un lista riba nan mes, nan a core join cu otro pa purba forma un lista" . 

KICO NAN TA PARA P'E

"Mi persona no ta drenta politica pa haña poder of enrikese mi mes. Politica ta pa sirbi e pueblo y no pa e pueblo sirbi e politica, manera cu e situcaion ta for di 1986".  Segun Henriquez, e no ta asina cu e pueblo tin cu depende riba kwa minister of politico e conoce pa hanja un oportunidad pa trabou of cualkier otro projecto. No tin opportunidad igual na e pais aki. Tur e tipo di politicanan aki a contribui na haci nos pueblo dependiente di e gobierno cu sinta. Pesey nos pueblo mester ta consciente cu ta e pueblo tin e soberania riba cualkier gobierno cu sinta. Pueblo ta independiente di cualkier gobierno paso ta pueblo tin e poder den su man. "P'esey nos di partido MAS lo percura cu nos pueblo recupera e poder soberano aki back den su man" Henriquez a finalisa bisando. Lesa e declaracion completo di e partido aki.