Kock: InselAir Aruba mester cumpli dentro di 10 dia

ORANJESTAD - InselAir Aruba tin debe miyonario pa cumpli cune, y cu incumplimento di pago di placa di pensioen y belasting di e trahadonan, nan no ta cumpliendo cu ley. Asina abogado David Kock a argumenta den corte dialuna mainta. Kock ta representa un grupo di mas di 40 trahado cu no ta dispuesto pa warda mas y kier pa nan doño di trabou cumpli cu e pagonan atrasa. Y e abogado kier pa esaki keda paga den 10 dia despues di e veredicto, y mara esaki na un multa si InselAir Aruba no cumpli cu e pago. 

E CASO 

Kock a cuminsa na bisa cu e no kier tende cu InselAir tin problema cu Venezuela, etc etc pasobra esey no ta e caso aki. "E caso aki ta pa forza InselAir Aruba pa cumpli cu su obligacion manera stipula pa ley" Kock a bisa. E hecho cu ta retene placa di e trahadonan  pa 2 aña pero no traspasa esaki pa e respectivo instancia, Kock ta tuma e compania na malo. Mas ainda unda cu tin un grupo di trahado cu no ta ni registra na e compania di seguro (Guardian Life) pero cu si ta kita nan placa sagradamente tur luna. E excusa cu seguro ta atrasa den calcula e primanan, y e hecho cu InselAir ta manda su informacion laat, no ta corecto. Segun e abogado, InselAir ta cobra placa di trahadonan pero ta use pa algo otro. E abogado tin problema pa kere tur e 'excusanan' cu InselAir a bin cune, unda cu e seguro no ta acepta pago parcial, sino solamente mensual, no ta corecto segun Kock pasobra InselAir Aruba si ta cobra e placa di e trahadonan tur luna. "InselAir tin cu culpa su mes y no tin cu culpa otro hende manera e compania di seguro". For di e propio compania di seguro, Kock a mustra cu nan a haya confirmacion cu InselAir no a cumpli cu pagonan y cu e pagonan cu nan a cumpli cune te cu final di 2015, ta pagonan atrasa. Dado momento e compania di seguro a stop di procesa InselAir pasobra nan no tabata cumpli cu nan pagonan. "Guardian a confirma cu for di 2016 (InselAir Aruba) no a paga seguro mas. 

BELASTING

Den caso di belasting, aki tambe InselAir tin debenan grandi, y a haci mencion di e suma di 1.8 miyon florin cu tin habri na belasting. Segun Kock, departamento di belasting a confirma cu for di 2015, InselAir Aruba no ta pagando belasting. De hecho, na februari di e aña aki a bisa delanta cu nolo por paga e siguiente tres lunanan tampoco. Tur e tempo, InselAir Aruba si ta sigui retene e placa di belasting, sin traspasa esaki. Ta papia di un suma di 170 mil florin cu tin cu paga tur luna, y cu no ta cumpliendo cune. Ni ora cu e compania a priminti un garantia di banco di InselAir International di Corsou, ni esey no por a keda cla cune segun Kock. 

INSTIGA CONTRA OTRO

Otro practica incorecto di e compania segun Kock, ta cu ta instiga trahadonan contra otro. A purba haya un grupo di trahado pa firma cu nan no tin problema pa warda un poco mas pa por paga e sumanan atrasa. Otronan a nenga di firma pues awor tin un dos grupo contra otro. 

SUGERENCIA DI HUEZ

Kock a tuma nota di sugerencia di InselAir pa bin cu un comision, cu intermediacion di mediado di gobierno pa asina wak con a termino corto por resolve e problema aki. Kock tabatin problema cu esey pasobra no tin garantia cu esaki lo a resolve e asunto. Como tal huez a cera e tratamento y ta dicta sentencia dia 14 di december proximo.