InselAir Aruba: Boluntad pa paga, pero no tin capacidad awor

ORANJESTAD - Ta incomprendibel y condenabel con un grupo di trahado kier stroba intentonan di InselAir Aruba pa resolve e problema financiero di e compania. Asina abogado Arlene Ellis a debati den corte dialuna mainta den e caso cu un grupo di trahado a entama contra InselAir Aruba. E punto ta atraso di traspaso di placa di trahado na belasting y pensioen. Un debe di mas di 3 miyon florin cu InselAir lo tin cu cumpli cu ne. Si hues dicta na fabor di e trahadonan, e ta hinca e compania den problema financiero serio y por tin consecuencia. Den corte a haci mencion, cu lo tin cu te hasta para e operacion completo. Na NoticiaCla.com sinembargo despues Ellis a bisa cu lo tin cu redestina e fondonan. Pero cu enberdad e ta hinca su cliente den un problema serio. 

E CASO

Ellis a argumenta cu ta apenas 2 siman pasa ainda cu a haci peticion na e contra partido pa un solucion, pero e no a haya ni reaccion riba dje. A pidi pa wanta e caso aki en espera di un solucion cu InselAir Aruba ta trahando ariba. No ta desmenti cu tin problema financiero, pero cu no ta cuestion cu no tin boluntad pa cumpli sino e incapacidad pa por cumpli (geen onwil, maar onmacht). Ta mustra cu enberdad InselAir no a cumpli cu e pagonan manera menciona, pero pa motibo di e situacion precario financiero, a haci un escohencia. Sea ta paga e salarionan of ta paga e belasting y pensioen. A scohe pa e prome, cu e pensamento cu lo paga e otro despues. De hecho, segun Ellis, a traha pa un plan pa entrante fin di januari 2017 cuminsa paga e sumanan atrasa pa un periodo di dos aña, incluyendo e interes. Esaki pasobra den e proximo simannan, tin desaroyonan cu por yuda InselAir Aruba di tal forma cu por genera e placa aki. Entre nan a haci mencion di e comision na Corsou cu ta atendiendo cu gobierno di e isla bisiña pa un suma di placa como injeccion. Cu esaki keda aproba, e ta bira un 'lifeline' pa Aruba tambe cu ta pone cu por cuminsa paga esaki. 

CONSECUENCIA DI SENTENCIA

A mustra cu si hues dicta cu mester cumpli cu e pagonan atrasa den e periodo awor, esey lo nifica un sla financiero serio pa e compania unda cu no por cumpli cu e payroll mas y cu mester para e operacion di InselAir Aruba. Ademas, e embergadura di e paro di operacion por ta mas lew unda cu islanan ta keda incomunica cu otro. Pues interes general ta halto akinan segun e abogado. 

SITUACION DI E COMPANIA

Ellis a pinta un cuadra financiero delicado di e compania, indicando cu for di comienso, e compania tabatin un 'atraso' den p.e. pago di seguro pa motibo di e sistema con seguro ta funciona. Esta ta entrega lista di trahado, y despues di un aña ta calcula prima pa despues e compania respectivo paga. Dado momento a splica cu mirando e situacion, no tabata registra trahadonan mas pasobra no a paga, cu ta splica pakico tabatin trahadonan no registra mes na e compania di seguro. 

Pa loke ta e trahadonan, Ellis ta haci mencion di tres trahado specifico cu ta tras di e caso aki, di cual ningun di nan ta cu e compania mas pues e futuro di e compania no ta importa nan mas. Ademas varios di e trahadonan di e grupo lo no ta traha cu e compania mas. E situacion financiero tabata bon te cu november 2014 ora cu prijs di petrolio a cay aden, segun e abogado. Y na fin di 2015, InselAir a haya su mes incapas di cumpli cu su responsabilidad financiero. 

PASONAN PA DRECHA SITUACION

E abogado a repasa tambe tur loke cu e compania a y ta haciendo pa drecha e situacion. Entre nan, a reduci e cantidad di trahado for di 129 trahado na 117. A reduci e cantidad di destinacionan di 13 pa 5. Problema ta cu mientras cu ta mas facil pa reduci e destinacionan, no por a reduci e cantidad di personal (payroll) mes lihe. A pidi hues pa rechasa e demanda di e trahadonan, y pa a cambio, forza pa reuni hunto y yega na un solucion cu ta traha pa tur hende. Hues ta dicta e sentencia dia 14 di december proximo.