STA: SEPPA a bende trahadornan di Serlimar

ORANJESTAD - SEPPA a bende trahadornan di Serlimar y patrimonio di pueblo. Asina e Sindicato di Trahadonan di Aruba (STA) ta reacciona riba e reciente desaroyo na e compania di limpiesa estatal. Segun presidente di STA, Diego de Cuba, despues cu empleadonan di Serlimar a bay den accion dia 5 di december ultimo sindicato SEPPA a bay delibera cu Gobierno di Aruba pa asina trata di yega na un acuerdo locual cu lamentablemente no a sosode. Segun de Cuba, no tin acuerdo entre SEPPA y Gobierno di Aruba. 

FASTBALL

"SEPPA a pasa tur e empleadonan di Serlimar un “fast ball” bou di nan nanishi y e documento cu a ser firma 5 di december 2016 pa Ministernan M.E. de Meza, O.B. Sevinger y R.A. Arends ta simplemente un afirmacion con Gobierno di Aruba ta preparando conhuntamente cu SEPPA pa bende partimonio nacional esta Serlimar Sui Generis cu e sponsernan mayor di e partido den gobernacion. Segun SPA, gobierno di Aruba actualmente ta subsidiando e compania Serlimar aproximadamente 16 million pa aña. "E placa aki ta parti di e placa di belasting cu e trahadornan di Aruba ta contribui cu ne den caha di gobierno" de Cuba ta bisa. 

PROCESVERBAAL

Sindicato di Trahadornan di Aruba (STA) a firma un proces Verbaal na februari 2014 conhuntamente cu Gerecia di Serlimar y mediador di gobierno caminda Serlimar ta reconoce e sindicato STA como e representante oficial di e empleadonan trahando na Serlimar Sui Generis. E tempo aki sindicato STA a solicita un referendum via di oficina di Mediador di Gobierno di Aruba y a bin compronde cu esaki lo no tawata necesario si gerencia di Serlimar reconoce e sindicato STA como e sindicato pa cu e empleadonan di e compania locual cu a sosode tambe.

REUNION ENTRE SPA Y GOBIERNO

"Pa es motibo aki sindicato STA a solicita un reunion cu caracter di urgencia cu e Ministernan concerni mirando declaracion nan cu a sali den publicidad entorno seramento di e DUMP na Parkietenbos locual cu den e concepto di STA no ta necesario si reactiva e aparato pa procesa e desperdicio domestico cu ta ser deposita na e “Landfill” na Parkietenbos cual aparato pa motibo di terkedad di parti di Gobierno no a wordo repara debidamente como kiera cu Gobierno di Aruba no kier a inverti mas placa den esaki y a opta pa bay bringa e compania “Bouldin & Lawson” den corte". 

BOULDIN & LAWSON

Gobierno di Aruba a perde tur su caso nan den corte cu Bouldin & Lawson esaki ta trece cu ne cu awor aki Gobierno lo mester bai paga un cantidad bastante grandi di placa na dicho compania. Dialuna 12 di december sindicato STA conhuntamente cu su delegadonan y abogado lo reuni cu Gobierno di Aruba pa discuti e futuro di Serlimar. 

PATRIMONIO DI PUEBLO

Segun e sindicat STA, nan no ta di acuerdo pa laga e sindicato SEPPA conhuntamente cu Gobierno bende e Patrimonio Nacional aki esta Serlimar cu compinchinan y sponsernan di nan campaña tambe sindicato STA lo reuni cu e empleadonan di Serlimar pa determina nan decision pa cu e sosten necesario pa cu un posibel accion masal y fuerte di parti di STA conhuntamente cu e empleadonan pa demostra Gobierno y tambe e sindicato SEPPA cu mester stop di tuma hende haci y trata e trahadornan di Serlimar cu mas respet y cu mas transparencia.