Inval na Cilo diabierna y a bay cu tur trahado y gerente

ORANJESTAD - E establecimento popular Cilo City Lounge den Renaissance Marketplace for di diabierna anochi ta cera. Diabierna anochi personal di Warda Nos Costa a haci un 'inval' na e establecimento y a bay cu trahadonan y tambe e gerente debi cu nan lo no tabatin nan documentonan na ordo. Ademas tin un investigacion tambe andando pa loke ta e benta di e lugar recientemente. Fuentenan cerca di e caso a confirma e caso di ayera nochi, y tambe di parti di Renaissance Marketplace a confirma cu nan ta na altura di e caso aki. E establecimento mientrastanto ta cera, y tin un papel riba porta cu ta bisa cu nan ta 'cera debi na mantenimiento' y cu nan ta 'pidi nan despensa sincero pa esaki'. NoticiaCla.com a compronde cu e accion di diabierna tabata resultado di un investigacion di algun siman cu a culmina den e detencion di personal y gerente di e lugar.