Lejuez: Conocido locutor ta keda deteni por lo pronto

ORANJESTAD - E conocido persona O. Jansen, conoci den comunidad como Mc Oz, por lo pronto ta keda deteni. Asina su abogado Chris Lejuez a confirma durante e noticiero NoticiaCla Merdia na Power FM. Lejuez a confirma cu e ta un 'zedenzaak' cu ta relata abuso sexual cu un menor. Loke ta complica e caso pa su cliente ta cu e persona a admiti cu e tabatin relacion cu e persona menos di 16 aña. "Bo por conclui for di esey cu e ta haci su mes culpabel na violacion di e ley ey" Lejuez a bisa. Loke e ta nifica pa e cliente ta cu e por conta cu por lo pronto Jansen lo keda deteni. "Probablemente te dia su caso bin dilanti", Lejuez a sigui bisa. E abogado a bisa tambe cu tanto Pasco y Aña nobo su cliente lo keda deteni. 

LEY TA HOPI STRAIGHT

Segun e abogado, e ley den e caso aki ta hopi straight unda cu ta bisa cu un persona mayor di edad tene un relacion cu un persona menor di edad entre  12-16 aña, esey riba su mes ta castigabel. Hasta si e victima gañabo cu e tin 17 of 18 aña, of cu su curpa a desaroya di tal forma cu bo no por saca afo cu e ta un menor di edad, no tin niun excuse segun e abogado. "Ley ta bisa cu menos di 16 aña, bo ta castigabel. Punto. Bo no tin defensa" e abogado a sigui bisa. Ni si e persona (victima) bisa cu e tabata cu su aprobacion (concenti), e ley ta traha pa proteha e menor di edad y no ta hiba na cuenta 'si bo sa of bo no sa'. "Ley ta bisa solamente cu si bo tabatin un relacion cu un persona entre 12 y 16 aña, bo ta castigabel. Punto. Hasta si e ta consentual, relacion amoroso, el a gañabo, maakt niet uit. Bo a hacie, bo a viola ley y bo por ricibi e castigo ey. Esey ta nifica cu obviamente e locutor su detencion a keda prolonga  diabierna cu 8 dia, y por expect cu despues di di e 10 dianan e por sigui wordo prolonga y despues ta mande pa KIA.