Andin y Otmar oficialmente a uni politicamente via protocol

ORANJESTAD - Otmar Oduber y Andin Bikker a firma e protocol cu ta nifica union di e personanan aki politicamente. Cu e protocol aki nan ta confirma cu nan ta uni forza den un solo plataforma politico cu ta hiba e nomber P.O.R. (Pueblo Orguyoso y Respeta). E firmamento a tuma lugar diahuebs mainta na Cas di Cultura dilanti miembronan di tanto partido POR y partido Democracia Real. Cu e firmamento aki, ambos persona a confirma nan determinacion pa hunto nan acepta e reto politico y tuma loke nan ta yama 'e forza nobo' y guia esaki pa e proximo eleccion. Bikker a confirma tambe cu ta Oduber a haci e asercamento pa Bikker forma parti di su partido. Algo cu el a gradici y a acepta tambe. 

PAKICO UNI

Bikker un biaha mas a splica cu ta tempo pa drenta gobierno y e forma pa haci esaki ta uni cu un otro partido pa tin mas forza. Den tres eleccion el a haya e sosten pa e por keda forma parti di Parlamento, aunke como oposicion pero cu awor e ta cla pa drenta gobierno. Den forma cu Bikker ta gusta haci, el a compara e asunto cu ora cu el a gradua di scol, y tambe pa su profesion como abogado. "Awor mi a gradua pa drenta gobierno" Bikker a bisa. El a sigui pa lesa parti di e protocol. "A dicidi di uni forza pa via di e plataforma politico nobo aki, presenta pa medio di presentacion di lista conhunto na e proximo eleccion" Bikker a finalisa bisando. 

ORGANO DI CONSULTA

A mustra cu lo tin un organo di consulta cu lo asisti e partido den traha e lista cu ta bay yuda nan yega na e victoria. Tambe e colornan ta keda uni, tanto blauw y cora cu ta presente den e union y material pa e campaña. Lo tin capacitacion di e miembronan pa garantisa e nivel di politica na Aruba, unda cu tin hopi remarke negativo awor. Algo cu nan kier cambia y hiba na un dimension mucho mas halto. E idealnan di partido lo wordo guia pa pragmatismo, cu ta algo cu ambos politico a aprecia di otro.