Heerenveen: Retironan ta bay den forma di 'afvloeiing'

WILLEMSTAD/DEN HAAG - Mientras cu ta papia di retira entre 80 pa 100 persona di InselAir International proximamente, e realidad ta cu InselAir a pidi permiso awor pa retira solamente 38 persona. Asina e co-fundador, vice-president international di InselAir International Edward Heerenveen a bisa NoticiaCla.com diahuebs mainta. E resto di persona lo bay den 'fase' of den forma di 'afvloeiing'. Mientras cu a haci e mencion cu ta Corsou tur e retironan ta cay, a mustra cu esaki no ta solamente na Corsou pero mas 'par di lugar mas'  incluyendo Aruba. Pero e no por a sigura esaki si (e cantidad cu lo haya retiro na Aruba of si lo tin retiro mes). "Aruba ta un otro entidad di InselAir cu ta riba su mes, pero mi no ta kere cu na Aruba lo tin dje tanto problema pa cu personal". 

COMUNICADO EMITI

Heerenveen a referi na e comunicado cu a sali mas tempran e siman aki papiando di e medidanan di austeridad cu e compania ta tuma pa por garantisa continuacion di operacion. "Nos a pidi ontslag pa 38 hende via SOAW. E hendenan ey ta hendenan cu ta cay bou di un tipo di loongrens y di nan nos ta lay off 38" Heerenveen a bisa. Despues tin e normale afvloeing cu ta hendenan cu ta riba contract cu e compania. "Eseynan ta bay ora cu nan contract caba. Tin hende cu ta caba te den maart otro aña. Nos ta sigui paga nan gewoon y na maart nos no ta prolonga nan contract.". Tambe tin loke e ta yama 'natuurlijke verloop' cu ta hendenan di 60 aña cu tambe ta bay wordo 'afgevloeid', of 'gefaseerd'. "Riba e manera aki tin un 'zachte afvloeiing' caminda ta mira cu e hendenan cu ta bay, nan ta bay gefaseerd y tin e tempo pa busca otro trabou si nan kier den e periodo cu nos ta haci e lay off ey pasobra nan no ta keda sin entrada di awe pa mayan".