Trahadonan InselAir Aruba mester tin mas pasenshi

ORANJESTAD - " Trahadonan (di InselAir Aruba) mester compronde si, kico ta e consecuencia di un condena di un huez den e caso aki si e condena ta contra Insel Air". Asina e Co-fundador, vice-president international di e compania madre esta Edward Heerenveen a bisa NoticiaCla.com diahuebs for di Hulanda. Manera cu e portal aki a raporta e siman aki, e trahadonan di e compania ta hiba Insel Air Aruba corte diabierna (mayan) pa forza e compania cumpli cu pago di belasting y pensioen di e trahadonan. Segun Heerenveen, e ta pidi e trahadonan pa wak atras kico Insel a haci den pasado y tuma esey como ehempel pa cada paso cu e trahado(nan) kier tuma. E compania pa motibo di falta di cashflow, a opta pa (mescos cu a haci na Corsou unda cu si a yega na areglo cu Gobierno) paga e placa atrasa, asina cu esaki ta posibel. E trahadonan no kier tende di esey y a opta pa hiba e corte.

FACIL PA KIBRA UN COMPANIA

Heerenveen ta mustra cu ta facil pa kibra un compania cu tin 'perspectief'. "Pero e ta tumabo años pa bo but'e bek. Anto esey  mi ta bisa nan: Wak e cos ey bon" Heerenveen a sigui bisa. E ta recorda e trahadonan cu nan ta haya salario paga tur luna pues nan no a falta esey. "Anto si bo tey busca aworaki pa bo pensioen ,cu nos a bisabo cu asina cu e cos ta cla cu Venezuela e ta wordo ingelost den un tiro, bo kier bringa pa bo pensioen?". Si e compania kibra e pensioen lo no wordo paga tampoco. "Pesey mi ta bisa tur hende ban rustig, overweeg kico bo ta haci pasobra si ta pa venganza bo kier haci cierto cosnan ( Heerenveen no ta mira otro cu esey ta e intencion) si bo sa cu nos a bisabo cu nos lo pag'e ora cu tin e cen den un tiro, y toch bo kier bay, mi no sa kico ta e doelstelling di e hendenan cu ta bay (corte)". E hefe ta spera cu sano huicio prevalece anto wak kico ta futuro di tanto nan como e compania na Aruba cu tin e potencial pa e bin bek unda cu e ta. Dado caso huez dicta na fabor di e trahadonan, Insel Air Aruba den sentido cu ta obliga pago mesora, anto no por, e compania lo tin un problema serio, Heerenveen a confirma aunke no a specifico kico esey lo ta. 

CASO DIABIERNA

Abogado di e trahadonan mientrastanto, esta David Kock diahuebs mainta a confirma cu ainda e caso ta poni pa tuma lugar contra InselAir Aruba. "Insel hasta a start un campaña pa acerca mi clientenan direct pa pidi nan firma pa bisa cu nan ta di acuerdo cu uitstel" Kock a bisa. Cu esey e compania lo kier pa e trahadonan 'geef aan' cu nan ta di acuerdo pero e abogado no. E caso ta entama pa e trahadonan, mirando cu nan a bin compronde cu pa algo mas di dos aña e compania no a traspasa e fondonan destina pa pensioen y belasting respectivo. E hecho cu Heerenveen a pidi pa pasenshi, no a cambia e pensamento di e trahadonan y te cu awor e caso ta sigui, e abogado a confirma na e portal aki. Foto cortesia CuracaoChronicle.