Hooyboer: SMOA mester proba cu no tin hende local pa funcion di rector

ORANJESTAD - "Nos ta contento cu e verdicto di juez den e caso sumario cu SMOA a entama contra mi". Asina minister di enseñansa Michelle Hooyboer a bisa NoticiaCla.com como reaccion riba e caso cu SMOA a perde. E caso tabata uno cu SMOA a entama pasobra gobierno no kier a duna subsidio pa cubri salario di e rector nobo di Colegio. 

MAS CASO

Aunke cu Hooyboer ta contento cu e veredicto, e ta conciente cu e posibilidad ta existi cu SMOA lo bolbe entama caso den futuro. "Sinceramente mi ta spera cu esey no lo ta e caso, y SMOA lo re-evalúa e solicitatie nan cu ya caba nan a ricibi for di e candidatonan local cu tin e capacidad". E mandatario ta mustra cu e ta para ariba cu e candidato no necesariamente mester ta uno di afo." Nos ta convenci cu tin candidato local, mescos cu pa varios aña tabata tin Rector local, y manera tabata tin y tin actual na colegio San Nicolas" Hooyboer a sigui bisa. 

MANEHO DI SUBSIDIO

Gobierno a mustra den e caso aki cu e motibo cu a rechasa e subsidio ta pasobra e persona en cuestion no tabata cumpli cu e.o. e rekisito di edad. "  Subsidie pa tur instancia ta abase di ley y beleid di gobierno. Pa gobierno subsidia e salario di e Rector, e tin cu cumplí cu tur rekisito, entre otro edad" e mandatario a bisa. Hooyboer ta mustra ademas cu e unico cu ta perhudica colegio ta SMOA cu ta skohe pa pusha un candidato cu no ta cumplí cu ley y beleid di gobierno. Esaki riba e pregunta cu si e asunto aki no ta perhudica e desaroyo na Colegio cu ta pone cu ainda no tin un rector nobo. 

CRITERIA

Ademas segun e mandatario, fuera di cu e candidatonan pa rector mester cumpli cu tur rekisito, mester por demonstra tambe cu ningun otro persona ta cumpli cu e rekisitonan aki. Esaki pasobra door di trece un persona di exterior, esaki ta crea gastonan extra. Esey ta e caso actualmente cu maestronan, pasobra tin un escases di maestro. Den caso di e rector sinembargo, no tin indicacion cu no tin ningun hende local cu no ta cumpli cu e rekisito" e mandatario a bisa finalmente.