Polis di henter Reino Hulandes buscando Robertico Inesia

ORANJESTAD - Den en programa Opsporing Verzocht cu a tuma luga diamars ultimo, De Dienst Regionale Recherche di unidad di Polis di Den Haag a pidi atencion pa buskeda di Robertico Inesia. Den un tiramento cu a tuma luga dilanti un café den Herenstraat na Den Haag riba diasabra 11 di juli 2015, dos homber a ricibi bala. A transporta un di e victimanan pa Hospital na tempo. E otro victima a fayece na e sitio.

Robertico Ramon Maria Inesia ta e sospechoso den e tiramento y su nomber di cariño ta Tico, naci riba 20 di april 1981. E ta midi 1.82 meter y tin tatuahenan remarcabel riba su brasanan. E ta procedente di Corsou y ta posibel cu ainda e tin su contactonan eynan of otro islanan den Caribe Hulandes. Robertico a disparce for di dia di e incidente.

Cuerpo Policial di Hulanda a solicita asistencia di e cuerponan ruman den Reino Hulandes pa acerca nan comunidadnan cu e pregunta cu si nan por a mira of papia cu Robertico Inesia despues di 11 di juli 2015? Tambe si nan lo por sa na unda Robertico ta permanece actualmente?

Den caso cu ciudadanonan tin un contesta riba un di e dos preguntanan ariba menciona, anto por considera Bo un testigo importante pa e investigacion penal andando. Bo por comparti e informacion cu e team di buskeda na Den Haag via de Nationale Opsporingstiplijn 0800-6070. Si Bo ta prefera di keda anonimo por bel na 0800-7000 na Hulanda of por bel e tipline di Cuerpo Policial di Aruba tambe na 111-41. Si bo ta prefera pa papia cu un recherche di e Team Criminele Inlichtingen, Bo por yama e number 079-345 8 999 na Hulanda.

A pone un recompensa halto na disposicion pa esun cu por duna informacion of indicacionnan cu por yega na detencion di e sospechoso fugitivo. Durante e programa Opsporing Verzocht a anuncia haltura di e recompensa.

Ta pidi comunidad pa ta alerta pa e fugitivo aki di Husticia Hulandes pasobra e ta un persona peligroso cu sa uza arma di candela; pues ta pidi publico pa no aserk’e Bo mes!