SEPPA: Ta wanta gobierno na promesa cu no ta bende Serlimar

ORANJESTAD - Un dia despues cu e welga di e trahadonan di Serlimar a termina, nan sindicato SEPPA a reacciona oficialmente riba e asunto. NoticiaCla.com a haya un reaccion si cortico di su secretaria general Magaly Brito diamars mes. Aki ta resalta cu mientras cu gobierno a duna e trahadonan cierto siguransa cu lo no cera dump na Parkietenbos por lo pronto, SEPPA no ta confia e asunto completamente. Y den nan comunicado, nan ta elabora mas riba esey. 

DUDA DI SEPPA

Segun e comunicado di e sindicato, ' Gobierno ta bisa di ta “solamente baha actividad na Dump” y esaki ta pasa pa esun cu awe ainda ta bo competencia den negoshi !!'. 

E intencion cu gobierno tin pa sanea Dump, e presion cu tin pa esaki, ta algo tur hende ta wak segun e sindicato. Pero con ta hasi esaki y unda trahadornan ta para ta contestanan cu mester wordo duna na trahadornan. 

"Gobierno a informa SEPPA  cu e intencion ta pa den januari baha e cantidad di actividadnan riba Parkietenbos. Esaki ta contrario na loke a sali den prensa, esta cu pa 1 januari 2017 ta sera Dump, lagando pueblo mes cu e pregunta kiko ta hasi cu e sushinan di tur dia y e trahadornan mes kiko ta para cu ‘nos’ trabao y ‘nos’ pan di cada dia"

FASE PA PREPARA PUEBLO???

Segun gobierno den e proceso di saneamente trahadornan di Dump mes lo sigi cu hopi trabao  cu ta relaciona cu esaki, gobierno ta bin cu lugar nobo pa warda e sushinan y tambe ta bai over na sera e buraconan. " Pues e trabaonan lo wordo hasi pa trahadornan di Dump mes bao supervision di  trahadornan di Serlimar".

SEPPA ta cuestiona e motibo cu nan (gobierno) ta bezig ta sanea e dump, ta pa e motibo ey lo a scoge pa e sushi wordo hiba na otro, cual akinan tambe ta lanta e pregunta, e pakiko lo bo hiba bo servicio netamente na esun cu awe ainda ta bo competencia den negoshi !!

"Pa cuanto tempo no ta mucho cla tampoco, paso asina por cuminsa kita trabao di un compania di pueblo manera Serlimar SG, ta laga pueblo custumbra cu e idea y majan kita esaki definitivamente" e sindicato ta sigui bisa.  

INVERSIONISTA TA HINCA PLACA PA UN RATO SO?Segun SEPPA, ningun comerciante ta bay hasi inversionnan grandi y ta papiando di miyones just pa un rato, just pa juda Al contrario. E kier su placa bek, mas ganashi y mas largo e keda gana miho. " Pues, e comerciante/compania/inversionista con cu kier jame su unico meta ta pa traha placa, hasi ganashi.   Alomenos saca su return on investment, y sigur no un acuerdo di 1 aña ni 2, pero sigur e lo desea acuerdonan pa largo. Esaki ta basico den mundo di negoshi"

Y negoshi ta keda negoshi, nada ta cambia akinan.

Pues,  e ta bon cla pa SEPPA y trahadornan di Serlimar cu algo tin. Y segun e sindicato, nan tin informacion cu negociacionnan ta andando.

GOBIERNO TA GARANTIZA TRABAO Y ENTRADA NA TRAHADORNAN DI SERLIMAR

Aunke  en principio e problema di Dump por mustra cu e ta afecta trahadornan na DUMP solamente, nos mester compronde cu den caso cu ta kita of bende Dump for di Serlimar na otro compania, cu esaki tin consecuencia pa Serlimar completo. Den e situacion cu nos ta na e momentonan aki, gobierno ta garantiza trabao/entrada y tur condicionnan laboral. Asina e sindicato ta rasona.

" Nos ta spera cu gobierno ta comprende si, cu ora nos ta papia di trabao nos ta referi na e trabaonan normal na Dump y ora nos ta papia di entrada, nos ta referi cu ningun trahador no ta bai atras den nan entrada di luna.  Y pa loke ta trata nan condicion laboral, cu trahadornan ta sigi cana den nan carrera normal, sin bin cu storianan bruha, manera cu na Serlimar mes a yega di purba di bin cune".

Pa awo SEPPA ta wanta gobierno na su posicion, esta cu niun compania ni persona no ta bai cumpra Serlimar, tampoco ta bai tuma trahadornan di Serlimar over, Dump ta keda di Serlimar !!    

SEPPA ta lamenta cu te awo  ta sinta pa atende cu SEPPA pa atende e asunto aki.   Ta bon cla cu mester a forza un reunion, forza gobierno pa duna cuenta na trahadornan y trece claridad riba nan Pan di tur dia pero tambe na nos cu ta forma parti di comunidad riba supuesto negosacionnan cu ta tumando lugar riba loke pa nos ta  “Patrimonio di Pueblo”.

Pa e falta di servicio SEPPA ta pidi disculpa den nomber di trahadornan, pero a keda demostra con esencial e servicio di recogemento y atende cu sushi ta pa un comunidad !!  Pesey nos mester defende e servicio publico aki, cu esaki mester keda den man di pueblo, mester keda uno pagable pa un y tur si mayan nos kier papia di un Aruba limpi.