Abogado Wix sentencia cu 'reprimanda' pa actuacion incorecto di su profesion

ORANJESTAD - Conseho di supervision di abogacia na Aruba a dicta sentencia contra abogado mr Ronny Wix (53) di bufete Wix & Zeppenfeldt diaranson mainta cu un 'reprimenda' (berisping) pa su actuacion incorecto como abogado. E ta e di dos nivel di castigo (for di 4) cu un abogado por haya ora cu e viola e regla di abogacia. A haya proba cu Wix ta culpabel di actua incorecto den maneha e caso di negosacion pa cu cliente(nan) y den esaki crea conflicto pa cliente cu consecuencia cu ta viola e honor di e profesion di abogacia.

E CASO 

Tabata su ex cliente Aruba Growth Fund (AGF) cu a entama e caso aki contra Wix, ya cu nan ta considera cu den proceso di negosacion pa compra di loke awe ta Hilton hotel, AGF ta haya cu e abogado a actua incorecto, y perhudica AGF den e negosacionan aki. Ta sinti cu Wix a actua den conflicto di interes cu a e.o. perhudica AGF financieramente den e deal aki. Entre e acusacionan, ta tilda Wix di a usa informacion confidencial di e deal y pasa esaki pa su otro cliente RIU, cu a purba di cumpra e mesun propiedad hotelero. 

SENTENCIA

E hunta a mustra cu a keda proba cu Wix a actua incorecto den e caso aki violando varios regla di abogacia. A cuminsa pa mustra cu no ta duda den declaracion di e demandante di AGF, sr Kan, y ademas Wix a admiti cu e tabata envolvi cu cliente RIU den e impasse despues di juli 2016. Segun e hunta, Wix a descuida e forma di actua cu su respectivo clientenan. Ademas e hunta ta culpa Wix di a actua contra confiansa necesario pa por eherce e oficia di un abogado. Hunta ta considera e actonan eherce pa Wix como 'grave', y ta haya cu e abogado mester a consulta cu e demandante AGF pa evita problema. Sinembargo, AGF no por a proba cu Wix a comparti informacion confidencial adkeri pa medio di e proceso di 'due dilligence', cu su otro cliente RIU. E violacion di Wix ta bay hopi lew segun e hunta, enpugna 'e honor di abogacia', specificamente actuando contra reglanan 1 y 7 di abogacia. E hunta a acepta e hecho cu esaki ta e prome violacion di e abogado, pero cu esaki no ta kita afo cu el a actua robez. Y den e caso aki, un advertencia como medida disciplinario, no ta suficiente y como tal ta eherce un medida di reprimando contra e abogado. E siguiente medida lo tabata un 'suspension', y e prome ta un expushon di abogado. Pa loke ta e sentencia, informacion cu NoticiaCla.com tin, ta mustra cu  despues di e sentencia aki, lo tin mas caso na caminda entre nan un caso civil unda cu AGF lo kier pidi daño y perhuicio cu por ta den varios miyon di florin. Lesa e veredicto aki.