Welga trahadonan Serlimar a termina pero ta keda vigilante

ORANJESTAD - E welga di trahadonan di Serlimar a termina awe tardi. Secretario general di Sindicato di Empleadonan Publico y Priva di Aruba (SEPPA) Magaly Brito a confirma pa NoticiaCla.com cu 'gobierno a ratifica e palabracionan haci den conseho di minister' manera priminti. Y mientras cu gobierno ta bisa awor cu no ta cera dump mas na januari 2017 pero ta 'reduci actividad' SEPPA no ta kere e storia mes cu 'no tin nada'. Segun Brito, "ningun comerciante ta bay haci inversionan grandi y nos ta papiando di miyones just pa un rato". Pero e ratificacion pa awor tabata suficiente pa e trahadonan reanuda trabou y asina termina e welga. 

FUTURO DI DUMP

Segun Brito, nan tin informacion cu gobierno no ta bay cera dump, contrario na loke a wordo anuncia anteriormente. "Pa januari lo baha actividad (na dump) pero lo no cera dump. A mustra cu SEPPA como tal ta bay den alert mode pa e paso cu gobierno kier dal cu dump, Brito a sigui bisa. 

E WELGA

E welga di e trahadonan a cuminsa dialuna mainta y a dura casi dos dia completo. Motibo di e welga tabata pa e trahadonan di Serlimar demonstra nan precupacion pa e situacion di dump y mas bien e inseguridad cu tin rond di e posibel ceramento di dump. NoticiaCla.com citando fuentenan den e Fundacion Parkietenbos, a relata recientemente cu gobierno a priminti cu na januari 2017 ta cuminsa cera dump. Esaki sin cu gobierno a informa e trahadonan di e plan aki. E trahadonan a exigi un clarificacion riba papel, firma pa gobierno completo unda cu tambe ta bisa cu 'no ta bay cera dump'. Pero no ta conoci si esaki tambe a wordo confirma pa gobierno preto riba blanco.