InselAir cu restructuracion di compania pa por sigui opera

WILLEMSTAD - InselAir international a anuncia cambionan den nan structura pa 2017 cu ta varia di reduccion di buelo, gasto y reduccion di personal. Asina e compania a anuncia diamars atardi pa medio di un comunicado. Segun e compania, nan ta haya  nan obliga di haci e cambionan debi na e cambio riba mercado. Segun e compania, e kambionan aki ta nesesario pa mantene un organisashon saludabel pa asina por cumpli cu e rol importante cu InselAir International tin, entre otro: den economia di Corsou en general. " Treciendo tur aña miles di turista na e islanan ABC, InselAir a duna trabou na centenáres di persona direkto i tambe míles indirekto i e ta e kompania di aviashon prinsipal entre e islanan den Reino. Cu e inisiativanan, cu ta wordo describí mas abou, InselAir tin fe i confiansa den futuro di su organisashon i su abilidad pa keda un di e dunadó di trabou mas grandi na Kòrsou" e compania ta sigui bisa. 

COMPENSA E REDUCCION DI E MERCADO VENEZOLANO

Segun e compania ultimo lunanan InselAir a logra compensa pa gran parti i cu exito, e bahada di buelo pa i for di Venezuela (di 35% pa 4%) agregando ruta i destinashon nobo, manera, Port of Spain, Barranquilla, Georgetown, Manaus, Havana, San Juan i Quito. Adishonalmente InselAir a subi frecuensha di buelo pa Paramaribo, Port au Prince i Santo Domingo.“A resulta di ta un reto pa compensa e perdida aki i nos a realisa ku nos mester acepta i restructura nos organisashon rondo di e realidat nobo aki”  Albert Kluyver, CEO di InselAir a bisa. Kluyver a sigui bisa ku pa e parti di e operashon ku nan no por compensa, nan lo mester baha gastonan.  "Pa e motibu aki nos a evalua tur parti den nos organisashon, manera finanza, operashonal, comercial, asuntunan general i tambe mantenshon pa asina por realisa bahada di gasto. Nos a revisa nos red di ruta i basa riba esei e otro iniciativa importante ta pa reducí nos operashon di buelo" e compania ta sigui bisa. 

REDUCCION DI PERSONAL 

Redusiendo actividadnan operashonal ta nifica cu InselAir mester reduci su gastunan i tambe e cantidad di empleado cu tabata nesesario den e operashon anterior. Un operashon mas chikito lo wordu maneha dor di un grupo di empleado mas chikito. Pa logra esaki InselAir lo reorganisa su forsa laboral dor di 1. Combina posishonnan, 2. Elimina departamento i /of 3. Cambia empleado di departamento. Empleado cu no por wordo garantisa un posishon den e structura nobo di e compania, lamentablemente lo mester termina e acuerdo di empleo cu nan. Lo sostene e grupo aki den busqueda di un posishon den otro organisashon. 

BISTA RIBA 2017 

Ta hopi lamentabel segun e compania ta sigui bisa, pero e pasonan ariba menshona ta nesesario pa sigura InselAir su posishon den “Pan American skies” i pa crea un organisacion stabil i financieramente saludabel i solido pa su actornan, incluyendo e empleadonan dediká cu lo keda den e organisashon cual ta cla pa futuro. Debí na accionnan implementa resientemente, InselAir ya kaba ta eksperencia mehoransa den su “on-time performance” di 60% pa 72% i ta bringando pa yega na 85% bek den futuro cercano. " Cu buelo for di Sur America pa Caribe, InselAir lo permanece e di 3 compania di aviashon mas grandi den region, sirbiendo 22 destinashon i 140 ruta ku un flota di 14 avion. Pa 2017 InselAir lo renoba su flota di MD i Fokker" e compania ta finalisa bisando.