Avion di Insel Air a bira bek Corsou sin aterisa na Surnam diabierna

ORANJESTAD – E avion di Insel Air cu a sali diabierna anochi pa Surnam, (manera cu NoticiaCla.com a raporta algun rato prome) a bolbe Corsou sin aterisa na Surnam. Den combersacion cu e CEO di Insel Air Aruba Frederick Nuboer, e la confirma cu e capitan, durante su trayecto den espacio di Venezuela, a wordo notifica pa toren di Maiquetia cu nan a check cu Surnam y cu nan a wordo informa cu tin problema cu e number di buelo, siendo uno existente of cu ta trata di un extra buelo. Esaki a pone cu e capitan a dicidi di bira e avion bek y aterisa na Corsou.

E capitan tabata bulando riba Islas Aves (pariba di Bonaire) rumbo pa Paramaribo ora cu e capitan, hayando e informacion di Maiquetia, cu e posibilidad cu Surnam por bira e avion bek, mes a dicidi di bira e avion bek pa Corsou. Mientrastanto na Corsou e pasaheronan tur a baha for di e avion, y e buelo ta cancela pa e anochi.

Tabata algun rato prome cu NoticiaCla.com a raporta cu diabierna si, e buelo di Aruba pa Surinam a haya permiso pa bula directo enves di pasa atrobe via Corsou. CEO di Insel Air Aruba, Frederick Nuboer a confirma diabierna anochi na NoticiaCla.com cu gobierno di Aruba a bay di acuerdo pa otorga un permiso temporal pa e buelo por bula director pa Surnam, sin un parada extra. E lo a origina si for di Corsou, pero unabes na Aruba, e lo a bula straight pa Paramaribo. Esaki contrario na e situacion di dialuna unda cu net prome cu lanta buelo, a bin tende cu e avion no a wordo permiti di sali for di Aruba pa bula straight pa Surnam.

“Surnam a yega na acuerdo cu Corsou pa cambia e tratado ariba e punto aki” Nuboer a splica NoticiaCla.com . “Pero esaki ta un acuerdo entre e directornan di e paisnan, esta e directornan di aviacion di e respectivo paisnan”. Mientrastanto tanto e minister di transporte y esun di relacionnan exterior di Surnam mester bay di acuerdo cu esaki ainda dialuna awor. “Pues ainda e asunto no ta full resolvi ainda” Nuboer a sigui bisa NoticiaCla.com. Awor tin cu check kico lo pasa cu e avion a bira bek, y con ta soluciona e problema cu e asunto di number di buelo.