Polis a gara atracado di supermercado hopi liher

ORANJESTAD - Empleadonan di Bon Bon Supermarket situa dilanti Mido Restaurant na Playa a bati alarma pa 10:35am pa un homber arma cu a drenta atraca nan eyden. Den pleno luz di dia e homber a exigi tur placa cu tabatin den e caha na e momento ey. NoticiaCla.com a raporta e caso inicialmente mainta caba. Polisnan den e area a activa mesora y unidadnan for di diferente ekipo y departamento, na un forma strategico y bon coordina a "cera" henter e area y asina facilmente a bin topa e sospechoso, cu ta cuadra cu descripcion duna, patras di Hotel Central. Parce e ta frecuenta e area ey, conoci pa uzamento di droga. 

E SOSPECHOSO

E sospechoso ta A.F.G-Z, naci na Colombia dia 13 di november 1981, pues recien a cumpli 35 aña. Polisnan a hib'e Warda di Polis di Playa pa eynan present'e dilanti un Fiscal Auxiliar pa dicidi riba su encarcelacion y pa pas'e pa "Atraco Team" pa mas investigacion. Cu e accion rapido di awe mainta Cuerpo Policial ta manda un mensahe na baho mundo cu crimen no ta paga y cu e chens pa gara Bo tur dia ta bira mas grandi. 

NEGOSHI MESTER SEGURIDAD

Ta corda negoshinan tambe pa sigura cu ta tuma tur medida di siguridad necesario pa preveni atraco of pa por yuda autoridad gara a sospechosonan mas lihe posibel despues di un caso asina. Ta referi na sistema di alarma y grabacion di video den bo negoshi. Esey hopi bes ta traha preventivo y sino ta yuda hopi pa identifica e sospechosonan despues di un acto criminal.