Diadomingo Otmar Oduber ta presenta su partido politico

ORANJESTAD - Diadomingo proximo Otmar Oduber ta presenta su partido politico nobo na comunidad. Despues cu el a anuncia cu el a dicidi pa sigui den politica y bin cu un partido nobo, a informa cu esaki lo bin den e di dos siman di december. E fecha ta 11 di december pa 10 or di mainta den Cas di Cultura unda cu aki e lo presenta e partido, e formato, e lista di candidato y mucho mas. Te awor, e partido a haya e apodo 'e forza nobo' aunke cu Oduber a sigura cu esey no ta e nomber di partido, sino mas bien un forma di genera un momentum prome cu e anuncio di partido. Sinembargo hopi a tuma esey caba como e nomber y ta referi na Oduber y su partido 'Forza nobo' caba. Tin informacion cu durante e presentacion aki, lo tende mas di e 'union' entre Oduber y Andin Bikker y con exactamente e fusion aki lo ta hinca den otro. Mientrastanto a compronde cu diaranson lo anuncia dos pa tres candidato cu lo aparece riba e lista. Entre nan a compronde cu lo tende si akinan abogado Joselin Croes tambe lo participa oficialmente cu e ta bira miembro di e partido. NoticiaCla.com a compronde cu e ta un di e candidatonan confirma y cu enberdad el a tuma e desicion caba pa subi e lista aki.