Apenas 38% di automobilista na Aruba tin number di auto paga

ORANJESTAD - Entrante diamars (6 december 2016), departamento di impuesto ta cuminsa acepta pago pa impuesto di number di auto pa 2017. Den e mesun rosea sinembargo, e departamento no ta sconde su preocupacion cu e situacion di pago cu a surgi den 2016 (y 2015) pa loke ta number di auto. Apenas 38% di tur auto registra na Aruba (72.440 auto) tin nan impuesto di number di auto paga completo manera mester ta. Un total alarmante di 62% di automobilista no a paga sea full of parti di nan number di auto pa 2016 (y otronan pa 2015), cu segun vocero di e departamento Meverly Romano, ta 'dramatico'. Specialmente si compara e cantidad cu un aña anterior cu tabata 'apenas 30% y prome cu esey 7% di 'incumplido'. 

FALTA DI RESPET

Romano a mustra cu e departamento ta considera e situacion presenta como un 'falta di respet' pa esnan cu si ta cumpli cabalmente cu e pago di number na tempo. Un total di 46.058 auto ta coriendo rond sin cumpli cu e pago di number, y cu ta nifica tambe cu nan posiblemente no tin nan seguro di auto paga tampoco. Na e altura aki, tur automobilista mester tin nan number paga completo. Pero pa straño cu por zona, mas cu mitar no a cumpli cu e responsabilidad aki. "E ta top" Romano a bisa, indicando cu esaki nunca antes a sosode. 

CONSECUENCIA DI NO A PAGA

Segun Romano, e hecho cu tin asina hopi hende cu no a paga nan number di auto ainda, a pone cu e departamento a dicidi di ta mucho mas estricto y ta nifica cu hendenan cu no a paga nan number na 2015 ni parti ei 2016, no por paga number di 2017. Ademas, si tin hende cu tin mas cu un auto, y cu a opta pa paga un auto completo y e otronan no, e no ta wordo permiti pa paga esun completo pa 2017. Sea e ta actualisa tur e autonan den su poder, of e no por paga nada. Por considera esey como e castigo pa e 'mal pagado'.

NUMBER NOBO

E aña aki, mescos cu e aña anterior a keda cu e plachi di 2015 (blauw) pero ta cambia e sticker. E sticker pa 2017 tin colornan blauw y tambe cora. Esnan cu paga e suma completo (henter aña) ta haya e sticker blauw y esun cu paga pa cuartal, ta haya esun cora. Esnan cu tin number A of uno personalisa ta haya e sticker rondo, y tur otro ta haya sticker vierkant. Entrante diamars 6 di december por cuminsa paga esaki na cualkier hulpbestuurskantoor of y departamento di impuesto na Camacuri.