SMOA ta perde caso contra Gobierno pa subsidio rector nobo Colegio Arubano

ORANJESTAD - E peticion di Stichting Middelbaar Onderwijs Aruba (SMOA) pa gobierno subsidia rector nobo di Colegio Arubano a keda rechasa den corte dialuna. Corte di LAR (Landsverordening Administratief Rechtspraak) a dicta cu SMOA no tin base pa pidi e subsidio. Cu esaki e ta trece un claridad den e diferencia di interpretacion cu SMOA tabatin cu minister di enseñansa Michelle Hooyboer Winklaar. Den comentario anterior na e portal aki, e presidente di SMOA Bart Kool a bisa caba cu nan tabata kier un claridad di interpretacion. Y cu e interpretacion, nan lo keda contento. Esaki ta nifica cu SMOA (lesa Colegio Arubano) no ta haya e subsidio pidi pa por paga e salario di e rector nobo, den persona di F. Claasens. E tabata e persona apunta pa SMOA pa lidera e scol secundario avansa na Aruba. No ta conoci si esaki ta nifica si Colegio ta keda e ora sin rector of si ta busca otro rector pa reemplasa esun anterior Hans Timmermans.  Lesa e sentencia aki

E CASO

Tabata comienso di luna di november (5 november) cu presidente di Stichting Middelbaar Onderwijs Aruba (SMOA)  Bart Kool  a  confirma na e portal aki cu ta hiba minister di enseñansa Michelle Winklaar corte. Motibo ta cu minister a rechasa peticion di Colegio Arubano pa subsidio pa paga salario di e rector nobo di e scol. Segun Kool, problema pa e subsidio ta e edad mas halto cu normal segun minister. Y SMOA ta diferencia di opinion cu e mandatario y p'esey ta bay corte. "Nos kier un claridad riba e realidad aki" Kool a bisa. Segun Kool, tin un diferencia di interpretacion entre SMOA y e minister. 

CLARIDAD

Kool a confirma pues cu SMOA a entrega e caso caba pa tuma lugar,  pendiente un caso di profundidad, esta bodem procedure. Cu e caso sumario, SMOA kier logra un asina yama 'voorlopige voorziening', esta un sentencia temporal cu cual nan por cuminsa funcion, pendiente e caso di profundidad. Si dado caso hues dicta contra SMOA, por lo menos nan ta contento cu tin un claridad, y sa unda nan ta para. Esey ta e intencion di SMOA pa laga un experto legal analisa esaki y determina kico ta e realidad aki. 

RECTOR TUMA CABA

Manera ta conoci, for di prome cu scol a habri na augustus, SMOA a logra haya un rector nobo cu a reemplasa Hans Timmermans cu a keda retira comienso di aña aki. Pero pa motibonan di e.o. pago di salario, no a keda cla pa anuncia su nomber pasobra Kool no ta haya ta corecto y tin un acuerdo cu SMOA no ta haci esaki prome cu tur cos. "Por lo menos di nos e (nomber) lo no sali". Kool ta consciente cu e nomber (Franciscus Claasens)a lek eyfo, pero e no ta bay confirma e nomber aki te ora cu tur cos ta cla. E loke tabata conoci, ta cu e persona aki ta un Hulandes masculino cu edad avansa.