Trahadonan InselAir Aruba ta hiba nan doño di trabou corte

ORANJESTAD - Trahadonan di InselAir Aruba ta hiba nan 'doño di trabou' corte diabierna awor. E motibo segun nan abogado David Kock, ta incumplimento di traspaso di nan fondonan respectivo pa p.e. fondo di pensioen y belasting. Ta calcula cu pa un periodo di algo mas di dos aña, e compania aereo no a traspasa placa di e trahadonan pa e respectivo fondonan. Y awor pa medio di Corte, kier forsa e compania pa cumpli. E CEO di e compania a confirma e caso aki na NoticiaCla.com. "Nos kier yega na un acuerdo cu e trahadonan na mesa, pero nan ta prefera bay corte. InselAir ta respeta e derecho di e trahador pa haci esey" CEO Frederick Nuboer a bisa NoticiaCla.com como reaccion riba e caso aki. 

E CASO 

Segun e abogado cu ta representa un grupo di trahado di e aeroliña di Aruba, e trahadonan tabatin un leve sospecho cu placa cu tabata wordo 'kita' di nan pa e.o. pensioen y belasting, no tabata wordo traspasa. Esaki nan a compronde di e compania cu ta atende cu nan pensioen. E suma segun e abogado ta uno cuantioso, si calcula cu di cada trahado ta kita 3% y cu acumulacion di 2 aña y mey, esaki por bira un suma basta cuantioso. Ta 3% di e trahador y 3% di e doño di trabou mester wordo deposita tur luna. Fuera di esaki ta kita tur luna loonbelasting, azv, aov y aww cu no ta yega na Servicio di Impuesto. Como tal e trahadonan mesora a actua y pone esaki den man di nan abogado. Nan peticion ta basicamente pa InselAir cumpli cu e pago aki mas liher cu ta posibel. Y por compronde awor cu e trahadonan ta prefera di trata esaki via corte y no sinta na mesa cu e compania mes. 

FONDO TRAHADO NA PELIGER

Loke tin e trahadonan preocupa, ta e hecho cu e pensioen pot por daña, y sigur afecta nan estado financiero. Berdad cu e compania lo 'por' dicidi di paga esaki a largo plazo, pero loke ta preocupa e trahadonan segun nan abogado, ta cu nan ta perde p.e. e interes cu nan por a gana riba e placa cu mester bira p.e. nan pensioen. Si e placa no ta deposita, e no por gana interes. Y si e compania tin problema financiero, pa e tempo ey, nan no ta haya nada mes. Pues nan tin urgencia pa keda cla mas liher cu ta posibel.

SITUACION FINANCIERO

E abogado ta compronde cu un di e motibonan cu e compania no por a cumpli cu e traspaso, ta cu nan no ta(batin) un cashflow sano. Placa no ta drenta manera mester ta. "Nan no ta ricibi suficiente (na entrada). Pero tabata kit'e si for di e trahadonan. Esey a pone cu awor ta forsa e compania pa medio di corte pa paga loke debe", e abogado a finalisa bisando. Foto cortesia CuracaoChronicle.