Denuncia contra uzo di forsa desproporcional den caso 297

ORANJESTAD - E doñonan di e restaurant +297 ta bay entrega denuncia contra e polisnan cu lo a uza forsa desproporsional contra nan. Asina nan abogado Chris Lejuez a confirma na NoticiaCla.com dialuna. Segun e abogado, por lo menos 2 biaha e polisnan a uza forsa di mas cu 'ta totalmente inaceptabel'. "A conseha nan pa entrega denuncia contra autoridad" Lejuez a sigura e portal aki. Pa loke ta e suseso mes, e abogado ta investigando exactamente kico a sosode cu cos a 'bay for di man' diadomingo marduga den e establecimento cu a conduci na detencion di e doño di e lugar, su casa y dos persona mas. Mientrastanto un di e 4 personanan a recobra su libertad. 

KICO A SOSODE

Segun Lejuez, no tin un version oficial ainda di polis pa determina exactamente kico a sosode. Mientrastanto ela haya copia di e videonan saca tanto di e establecimento como otro videonan disponibel. Aki mester determina kico a causa cu e 'cos a bay for di man'. Normalmente -segun e abogado- polis den un situacion cu a constata cierto violacion di regla -manera surpasa ora di cierre-, ta duna un chens pa e propietarionan cera e lugar, y den un caso mas extremo, ta duna nan un multa y cla. Den e caso aki e abogado ta sigura cu e lugar tabata cera pa publico, y cu un area aleha tabata musica enberdad pero no tabata bende alcohol. "Pero aparentemente esey tabata un molester pa polis" Lejuez a sigui declara na e portal aki. Pero pa conduci na detencion, e abogado ta considera mucho pisa. 

E VIOLENCIA

Mientras cu e abogado mester a tende e version di polis ainda, loke si e por constata, ta cu tabatin abuso di poder di parti di polis. E hecho cu por lo menos dos biaha polis a uza forsa dimas, Lejuez ta considera 'totalmente inaceptabel'. Ta papia di cu a viola proporcionalidad. "No mag uza forsa cu no ta necesario" Lejuez a bisa. E ta referi e.o. na e hecho cu un polis a dal y lastra un dama riba vloer siendo cu tabatin mas colega na banda cu por a asisti'e cu e no mester a haci esey. 

DETENCION

E situacion a causa cu polis a pasa pa detene por lo menos 4 di e personanan envolvi, incluyendo e doño, su casa y dos otro personanan. E personanan aki ta wordo acusa di 'wederspannigheid', osea obstrui trabou di polis. Un acto asina ta condenabel pa ley y ta duna polis derecho pa detene e persona(nan) en cuestion. Ora cu tin mas cu un persona cu ta ocasiona e 'wederspannigheid', ta suficiente pa polis pasa pa detencion di e persona(nan). Y esey ta loke a sosode den e caso aki. E intencion di Lejuez ta pa papia cu e fiscal pa su clientenan recobra nan libertad y wak si por cambia e caso aki den un multa, cu ta normal pa casonan asina. Contrario na pensamento, Lejuez no ta na altura cu e club y su doñonan tin un lista largo di iregularidad y cu nan a bira un 'conoci di polis' den e corto tempo cu nan a habri nan porta algun tempo atras. Mester bisa cu te cu awor ainda polis no a reacciona of duna un declaracion oficial riba e caso aki.