Lizmaury Kock a gana rifa di auto di Fundacion Sonrisa

ORANJESTAD - Na Garage Cordia a tuma luga un bunita evento diasabra anochi, cu un showroom completamente yen di hende, pa saca e felis ganado di e auto cu Fundacion Sonrisa a rifa. Pa e anochi aki a conta cu bishita di Sinterklaas y su Pietnan, meymey di un "Christmas Town" crea special pa e ocasion aki. 

Angelique Perez-Kelly, coordinado di Fundacion Sonrisa a duna di conoce cu e actividad aki a ser teni riba Dia Internacional di Personanan cu Limitacion.  Di tempran caba tur hende a yega y a cuminsa prepara e mesanan. A duna e clientenan e oportunidad pa trece nan productonan y cuminda pa bende. Tur hende tabata pendiente pa e rifa di Sonrisa. Tabata prome biaha cu nan ta tene un rifa di un auto y ela bay di un forma tremendo.

E ganado ta Lizmaury Kock di Casibari # 13-C, cu no por tabata presente pasobra e tabata trahando e momento ey, pero su mama a ricibi e premio p'e.  Nan a yam’e mesora pa dun'e e sorpresa cu ela gana e auto nobo aki.

"Nos ta hopi contento cu tur cu a contribui. E placa ta pa nos por sigui duna servicio, duna e miembronan e servicio cu nos ta ofrece. Pa e miembronan tin un sonrisa riba nan cara. Nan tabata full pendiente pa e bendemento di e rifa y p'esey ta bunita pa mira cu nan mes tabata enfoca riba e bendemento... Nan ta Sonrisa, sonrisa ta di nan, no ta di nos", asina Perez-Kelly a expresa. Pa loke ta e trato cu nan a ricibi di Garage Cordia, ela bisa cu esaki tabata sublime. 

Vanessa Hollander, encarga cu e departamento di Benta y Mercadeo di Garage Cordia a duna di conoce cu esaki tabata un celebracion cu pa hopi luna nan tabata preparando hunto cu Fundacion Sonrisa. A scoge e fecha special aki cual tabata Dia Internacional di Personanan cu Limitacion. E meta di Sonrisa tabata pa rifa un auto y conhuntamente nan a traha riba un plan. Durante mas o menos 8 luna, tur e miembronan di Sonrisa a yuda bende e bukinan.

Garage Cordia semper ta para cla pa yuda tur instancia y den e caso aki nan ta hopi contento cu Sonrisa  acerca nan. Ya caba nan a pidi pa otro aña tene e evento aki tambe cual tabata un exito total, Vanessa Hollander a finalisa bisando.

Garage Cordia Aruba a habri su portanan na juli 1965 cu solamente 10 auto den stock y algun mil dollar na piesa. E compania a crece y desaroya su mes bou liderazgo y cu e vision di Hans Schnog, te bira un di e agencianan di auto mas grandi na Aruba, den cual a bende mas di 25 mil auto den e añanan cu a transcuri y cu miyones di piesa den stock. Na aña 2005, Garage Cordia Aruba a habri su portanan den e edificio nobo na Camacuri, dunando nan mucho mas espacio pa por sirbi clientenan miho, cu mas facilidad y den un forma mucho mas eficiente.