Trahadonan di Serlimar den accion dialuna mainta

ORANJESTAD - Trahadonan di e compania Serlimar Sui  Generis a drenta den accion dialuna mainta na pia di trabou. Motibo ta e inseguridad crea pa gobierno cu e anuncio recien di prome minister Mike Eman e.o. cu lo cera Dump na januari y cu Serlimar lo cuminsa suministra e sushi colecta pa e compania priva EcoGas. E accion a inicia for di 5'or di mainta y ta dura te ora cu gobierno duna e trahadonan claridad riba nan futuro, segun vice presidente di sindicato SEPPA Edmundo Marlin a bisa NoticiaCla.com awe mainta. E accion a inicia na pia di trabou, pero despues a mobilisa dilanti di Bestuurskantoor unda cu e trahadonan tur a acumula. 

E PROBLEMA

Segun Marlin, ta mas cu un aña caba cu ta tratando e asunto aki di hiba sushi residencial pa EcoGas. Pero e tempo ey partidonan no por a haya otro y e cos a pega. Pero for di siman pasa ora cu a tuma nota den prensa (entre otro NoticiaCla.com) cu prome minister Eman a anuncia e desicion, e trahadonan di Serlimar a bira preocupa. Primordialmente e trahadonan na dump mirando cu a anuncia cu ta bay cera esaki. "E trahadonan tin miedo di perde nan pan" Marlin a sigui bisa e portal aki. Nan kier sa si ta bay paga Serlimar pa e sushi bay. Y si no ta haci esaki, elo bira un problema grandi. E problema ta cu si no paga Serlimar, e ta perde e entrada cu ta cubri henter e operacion y cu esey poco poco e compania aki lo 'bloed dood' segun e lider sindical a sigui bisa. 

E ACCION

E accion a inicia dialuna marduga 5'or y ta continua te ora cu e trahadonan haya un siguransa di nan pan. A compronde cu pa 10'or y mey e mandatario encarga, Mike de Meza lo mester invita un grupo di trahado pa combersa y pa 'trankilisa' y splica nan kico ta kico. Asina cu esey keda resolvi, e trahadonan por reanuda nan trabou. E trahadonan a mustra cu nan no tin ningun problema pa warda. Mes momento si, Marlin a pidi disculpa pa e interumpcion di servicio dialuna mainta ya cu e operacion for di marduga ta completamente paralisa. Esey ta nifica cu ningun sushi residencial ta wordo busca actualmente.