Actuacion contra polis den restaurant 297 tin hopi atencion

ORANJESTAD - E caso awe marduga den restaurant 297 unda cu polisnan a haya nan mes den un bataya cu e personal y gerencia(nan) di e lugar ta hayando basta reaccion. Mientras cu oficialmente polis no a duna un relato riba e suseso ainda, te hasta fraccion di partido di gobierno AVP a reacciona diadomingo anochi riba e suseso aki, condenado e loke a sosode marduga. 

E LOKE A PASA

Segun e portal 24ora.com nan ta raporta cu tur cos a sosode den careda di 4:10am ora cu polis a pasa banda di e lugar menciona, y a tuma nota  di un supuesto club priva den e restaurant, completamente ekipa cu bar y DJ. Segun e portal, polis a nota cu dilanti luznan tabata paga y e edificio tabata aparanta 'cera' pa pueblo. Sinembargo polis lo a drenta y tuma nota di actividad musical eyden contanto por lo menos 30 hende eynan -segun e portal di noticia-, cu tabata disfrutando di musica duro. 

CERA LUGAR

E informacion ta mustra cu polis a pidi e doño pa cera e lugar, pero e no lo a reacciona, y te hasta core cu e polisnan di e sitio. Varios cos lo a wordo grita den direccion di e polisnan. Ora cu polis kier a detene esnan cu ta causando desorden, a cuminsa lanta contra e polisnan y crea un tipo di chaos. E portal di noticia ta raporta cu polis a saca arma reglamentario y asina logra domina e publico, mientras cu tabata pidi refuerso urgente. Segun e informe, 3 polis a resulta herida y un di nan lo a haya un mordi door di e doño. Na tur a detene 4 persona, 3 Venezolano y 1 Colombiano. Ta sospechanan di 'openlijk geweldpleging' y di menasa un polis den funcion cu morto. 

NO TA PROME BIAHA

For di comienso di e restaurant su existencia, e tabata basta den noticia ora cu p.e. trahadonan a keha di pagamento laat di salario, trahadonan sin permiso, falta di carchi berde di departamento di salud y asina por sigui. 

REACCION FRACCION AVP

E fraccion berde den Parlamento a reacciona diadomingo anochi cu nan comunicado riba e tema. Entre otro e fraccion ta bisa cu "E violacion di ley y e agresion contra di polis den un nightclub den zona di turismo na Palm Beach diasabra marduga ta totalmente inacceptabel! Fraccion di AVP ta exigi pa tur doño y manehador di nightclub, restaurant, supermercado, tienda, hotel, etc. cumpli cu ley of carga e consecuencia y e peso completo di ley. Mescos ta conta pa tur ciudadano di nos pais. Pa loke ta trata e caso di diasabra anochi, fraccion di AVP ta urgi minister di Husticia pa laga aplica tur e sancionnan cu ley ta prescribi pa e violacion di e permiso pa opera e nightclub despues di oranan stipula, pa aplica e boetnan cu ley ta prescribi, pa husticia persigui esnan cu a agredi polis den ehecucion di nan trabou y pa evalua e posibilidad pa condiciona e permiso di e compania pa opera un nightclub na cumplimento estricto cu ley." Esaki tabata e prome reaccion di e fraccion di AVP riba loke a sosode diasabra anochi den e nightclub "297" na Palm Beach. E indignacion serca e fraccion pa loke a sosode ta grandi!" e fraccion a finalisa bisando. Lesa e declaracion completo di e fraccion aki. NOTA; Foto di e establecimento ta cortesia di www.restaurantweek.aruba.com