Rode Kruis Aruba a ricibi donacion grandi di MetaCorp

ORANJESTAD –  Despues di a inventarisa e dañonan material cu a keda atras pa motibo di awasero pisa di dia 29 di november ultimo, Rode Kruis Aruba a traha un lista di diferente articulonan di cas pa diferente famia cu a keda den necesidad. Mas di 100 cas a keda damnifica y tur pa motibo di awa cu a acumula y famianan a keda desampara. Semper apoyando esfuersonan comunitario MetaCorp a haci un donacion grandi na Rode Kruis Aruba.

Manera cu Michel La Haye, director di Rode Kruis Aruba a acerca MetaCorp nan a drenta den accion y mesora a puntra cu kico y con por a yuda Rode Kruis pa yuda esunnan den necesidad. “Nos a tuma e iniciativa di yuda nan cu un par di articulonan cu nan tabatin mester pa esunnan cu ta den necesidad pa motibo di awasero y e daño cu e awa a haci. Y awe nos a entrega camanan single beds y double beds completo pa famianan cu tin hende ta drumi un of dos persona den un camber,” asina Eddie de Veer, CEO di MetaCorp a duna di conoce durante un ceremonia cortico di entrega.

E la sigui bisa cu pa hopi aña caba MetaCorp ta yuda Rode Kruis ora cu nan tin mester. “Esaki ta djis un di nan cu nos ta haciendo. Casualmente awor ey e pickup a yega cu serbete cu nos a obsekia tambe. Esakinan a bin di Renaissance Hotel. Nan ta serbete bon pa uza na cas. Nan ta laba y dobla pero pa uzo den hotel e ta net turno pa cambia nan, pero realmente nan ta den bon condicion pa uza pa basta tempo ainda,” el a agrega.

Director di Rode Kruis Aruba, Michel La Haye a keda hopi contento cu e donacion di MetaCorp cu a duna 20 cama di un persona y 20 cama pa dos persona. E la sigui bisa cu manera tur hende sa, despues di e awasero, Rode Kruis a ripara cu hopi di e daño tabata na e matrasnan di e camanan cu a bira vies. “Bo por imagina Bo cu ora e beerput yena y bay over cu e awa sushi aki ta drenta den e matrasnan haciendo cu nan no ta uzabel mas,” Michel La Haye a splica. 

“Danki na e donacion grandi di MetaCorp, e damnificadonan ta haya un cama limpi pa drumi riba dje. A entrega e camanan caba pa asina e victimanan por drumi riba cama limpi y saludabel atrobe,” asina e director di Rode Kruis Aruba a conclui.