CITGO: Lo dura 4 aña prome cu refineria ta operacional 100%

ORANJESTAD - Refineria di Aruba (RDA) y CITGO ta trahando hunto pa start rehabilitacion. Esaki ta un di e mensahenan cu RDA a manda diabierna ultimo durante e cena anual di e gremio comercial ATIA. For di momento cu e gremio a anuncia cu e topico di e cena anual e aña aki ta e rehabilitacion di nos refineria, a nota un interes grandi di su miembronan. 

KI DIA TA HABRI E REFINERIA

Locual por a sinti cu mayoria invitado tabata kier sa, ki dia e refineria ta habri atrobe. E expectativa kisas ta cu na momento cu a anuncia reapertura cu den algun dia lo mira huma saliendo y e refineria den operacion completo bek. Durante e respectivo discursonan duna di ehecutivonan di e compania(nan), a splica cu como cu e refineria a cera for di aña 2012, lo tuma mas o menos 4 aña pa e por ta operacional 100% bek. Cu esey awor, di acuerdo cu e ehecutivo di CITGO, ta bay inicia e prome fase di 24 luna di rehabilitacion pa nan por cuminsa opera y despues di 24 luna mas, elo ta den full operacion.

E ROL DI RDA

Pa loke ta e rol di RDA mes, esey mas bien awor ta di ta doño di e planta y mester supervisa e huurdo, CITGO, pa e cumpli cu locual a stipula den e contract. Desde dia 1 di october 2016 Gobierno a funda Refineria di Aruba N.V. cu tin e concesion pa maneha e refineria, e terenonan y ta supervisa e huurdo, Citgo Aruba Refinery, den nan operacionnan diario. Alvin Koolman, un experto den e industria petrolero, ta na cabes di e compania aki, cu ta doño tambe di Fuels Marketing & Supply Aruba, e compania cu ta maneha distribucion di gasolin, diesel y jetfuel pa nos pais.