Dump di Parkietenbos ta cera na comienso di 2017

ORANJESTAD - Entrante 1 di januari 2017 ta cuminsa stop sushedad di bay dump na Parkietenbos y kimamento ta ser para. Asina e  miembronan di fundacion Parkietenbos a tende di prome minister Mike Eman durante un reunion e siman aki. 

OFERTA ECOGAS

Como solucion, Ecogas a ofrece pa tuma e sushi y paket'e mand'e afor of stock e pa crush y gasific'e despues den nan sistema. "Nos Manifiesto tabata bisa cu nos ta pidi pa entrante januari cera e dump ya cu ela bay over y no kima mas tampoco. Gobierno entrante 1 di januari lo cuminsa cumpli cu e peticion di e bario", un miembro di e fundacion a confirma na NoticiaCla.com diabierna. 

PROBLEMA CU DUMP

Manera ta conoci, pa hopi aña -sigur e ultimo aki- tabatin keho di habitantenan di Parkietenbos, di e daño cu e dump tabata haci. Huma, malo holor y bestia y tur loke esaki ta haci cu e ser humano y e calidad di bida den e bario ey. A presenta un manifiesto na gobierno algun tempo pasa, y despues di deliberacion, ta parce cu esaki lo bira e solucion pa e bario.

PROTESTA

For di seno di trahadonan di Serlimar mientrastanto, a compronde cu nan no ta mucho contento cu e idea aki y cu tampoco nan ta informa riba e ultimo desaroyo aki. Por a nota varios mensahe di protesta, pregunta y preocupacion di varios trahado, entrenan esnan cu ta den nivel mas halto di e compania, aunke a bisa cu ta papia 'a titre personal'. Den curso di otro siman ta spera di haya mas informacion riba e tema aki cu a crea hopi discusion den comunidad. NOTA: Foto principal ta di archivo di noticiacla.com durante un situacion di candela na e dump.