Gobierno no ta hayando su parti di BBO y invoerrechten

ORANJESTAD - Mientras cu gobierno (di Aruba) ta logra mantene e deficit bou di e norma stipula di 2% (a logra e norma di 1.53% den e di tres cuartal di 2016), College Aruba Financieel Toezicht ta sigui precupa cu varios aspecto financiero. Asina CAFT ta relata den nan reaccion riba e rapport di e di tres cuartal di 2016, den un carta pa minister di finanza Angel Bermudez e siman aki. Den e relato aki NoticiaCla.com ta raporta e prome parti di e analisis. CAFT a cumbini cu gobierno na inicio di e proceso di control, cu gobierno lo presenta un rapport cada cuartal di aña basa riba nan ehecucion di e presupuesto. 

'MEEVALLERS'

Den un reaccion di 6 pagina, CAFT ta mustra cu tin algun 'meevallers' esta cu tin cosnan cu a bay bon pa gobierno pa loke ta entradanan 'isola' cu ta yuda e caha di gobierno. Ademas gobierno a tuma paso y ta logrando positivamente pa mehora e asina yama PEFA, (Public Expenditure and Financial Accountability), cu tin cu desemboca den un declaracion di control riba e situacion pa 2020. Cu e declaracion aki Centrale Audit Dienst (CAD) por duna un opion relativo riba e cifranan anual. Cu esaki gobierno ta tuma un paso importante pa pone e maneho financiero riba un nivel suficiente, door di implementa un nota di inventarisacion cu ta ilustra e puntonan di mehoracion. 

PREOCUPACION DI CAFT

Di otro banda CAFT ta mustra su preocupacion den varios area cu no ta bayendo bon. Entre nan, e hecho cu gobierno no ta hayando su parti di entrada na BBO y 'invoerrechten', y ainda e reduccion den personal di gobierno ta deficiente. CAFT ta mustra cu entre otro cu grondbelasting, entrada di BBO y invoerrechten, e sumanan no ta cuadra cu e presupuesto manera el a wordo stipula. Pues cu compara cu e loke presupuesto ta bisa cu mester a drenta, esaki ta hopi menos. Den e prome 9 luna di 2016, gobierno a ricibi 33 miyon na grondbelasting, cu enberdad ta 39% mas hopi cu e aña anterior, pero ta hopi menos cu e loke gobierno a pone den e presupuesto, esta cu mester tabatin un crecemento di 73% na e entradanan ey. "Esey lo por conduci na un decepcion pa 2016" CAFT ta sigui relata den nan reaccion. Pa loke ta e significacion di crecimento, CAFT ta mustra cu na invoerrechten y BBO respectivamente, a ricibi 29,5 miyon y 18,5 miyon mas cu na 2015. Pero mirando kico a presupuesta pa 2016, e sumanan por wordo considera igual di 2015 y 2016. Pues e grado di 'logro' serio den esaki ta bira pues e decepcion pa 2016. E positivo ta cu gobierno a ricibi e suma di 26.2 miyon florin na belasting di Valero na october ultimo. Algo cu no tabata presupuesta.