Mayornan precupa diabierna pasobra yiunan ainda no a haya studiegeld

ORANJESTAD – Studiantenan di Aruba cu ta studia den region, particularmente cu tin cu cuminsa scol dialuna awor, ainda no a haya nan placa di scol. Esey a pone cu diabierna hopi mayor tabata awa na wowo pasobra nan yiunan tabata pega na Merca sin por cuminsa scol. Algun mayor mester a acudi na banco pa saca fondo propio pa por a yuda pa por ‘schrijf’ nan yiunan in dialuna awor, sino nan lo a perde scol. Pero otronan cu no tabatin e poder financiero pa nan mes cay aden, a haya nan mes man na cabes, awa na wowo yorando di tristesa y precupacion pa nan yiu. Fuera di e grupo di Merca, tabatin yiunan cu otro caminda tambe ainda no a haya placa pa por a cuminsa nan scol. Mientrastanto den curso di siman e directora di e departamento di enseñansa, Annemarie Proveyer a mustra cu nan no tin tur culpa cu e situacion ta bayendo asina. Problemanan di restructuracion, fraude di trahado y presupuesto laat a wordo menciona como factornan contribuyente di e problemanan. Mes momento a mustra cu e situacion lo ta coregi y ta den proceso pa wordo coregi. Pero for di mayornan presente na e lugar, NoticiaCla.com a compronde cu e situacion no tabata cla y cu e mayornan cu no tin fondo, tabata desespera y man na cabes.