Populismo y neo-liberalismo den aña di campaña

Populismo y neo-liberalismo den aña di campaña

Posted on 12/1/2016 6:43 pm AST | Updated on 12/1/2016 10:01 pm AST

Na maart di e aña aki UPP a denuncia cu e hecho cu ta e propio trucknan di Serlimar, bou instruccion di e director di Serlimar di e tempo ey hunto cu e minister responsabel, tabata tira sushi den candela, pa di e manera ey tene e candela cendi. Lider di UPP, Booshi Wever a mustra esaki via di su Facebook cu potretnan cu e mes a saca. Mientras cu e tempo ey kier a laga pueblo kere cu ta “otro hende” ta pega sushi na candela.

Luna pasa, durante e calmazon cu tabata tin, sigur e candela aki tabata tin efecto riba no solamente e bario di Parkietenbos, sino riba henter Aruba. Pa varios dia, ora e biento a cambia tur hende na Aruba por a sinti e efecto.

Cu razon e bario di Parkietenbos, mas cu tur, a reacciona y a laga sa cu mester bin un solucion p’esaki. Nos por a scucha durante di tratamento di presupuesto un bay y bin di discusion, unda cu a tilda ex-minister Wever di e debacle aki, pero sin menciona cu ya caba ta pa 7 aña un otro gobierno ta manda y cu nada no a wordo haci. Nos por a mira tambe con parlamentario di e partido berde tabata yora den parlamento y riba facebook cu e tin reunion tocante Serlimar y dump di Parkietenbos pidi, pero esaki no a wordo yama ainda.

Entretanto nos por mira, den cuadro di aña electoral, cu tanto gobierno awor ta bin cu yen di promesa, y cu parlamentarionan di tanto gobierno como di oposicion ta haci pronunciacionnan populista pa asina calma e pueblo di Parkietenbos. UPP ta kere cu mester bin un solucion pa e problema di dump, cu ta molestia e bario atrobe y cu tambe ta nifica un menasa pa nos medio ambiente. E proyecto di dump, esta e planta di procesamento di sushi, concientemente y deliberadamente a wordo boycotea. 

Nos a bin ta destila caba for di algun tempo cu loke parlamentarionan cu ta sostene gobierno ta bisa ta cu lo mester haci un test pa mira e situacion di dump, pa despues tuma un decision di cierre di esaki. Esaki tambe ta loke awor ta bin ta pasando y na unda cu intencion ta pa cera dump y pasa e trabou di recohemento di sushi pa Ecotech. Informacion cu UPP ta dispone di dje ta bisa cu esaki lo sosode na un manera orkestra, pa asina mustra cu Serlimar ta bira obsoleto y cu p'esey lo no por sigui cu e tipo di dump aki. Gobierno a haya 8 aña, incluso pa boycotea e proyecto di dump y bini cu algo otro, pero no a haci nada ni pa alivia e situacion riba dump pa loke ta trahadornan, ni pa loke ta molester y peliger pa nos ciudadanonan cu ta biba den area.

Awor gobierno kier laba man y pasa esaki pa Ecotech, cu no ta un filantropo, pero un comerciante. 

 

 

 

 

 

Incluso nos tin comprendi cu nan lo kier cobra pa e sushi cu ta bay wordo deposita na Ecotech pa traha gas pa WEB. UPP ta kere, cu si esaki mester ta un solucion mes, anto Ecotech mester paga Serlimar pa esaki, pa asina por sigui cu un maneho pa drecha e situacion di dump. Cu otro palabra, despues di a paga pa e desperdicio cu nos mes ta produci (nos no ta haya esakinan regalo, nan ta den prijs hinca di loke 

nos ta cumpra), nos tin cu paga pa recohe sushi, Serlimar ta hiba esaki na Ecotech pa EcoGas y nan kier pa paga pesaki. EcoGas despues ta manda e gas aki WEB N.V., cu tin di paga EcoGas. Y e pueblo atrobe mester paga pa por haya coriente y awa cu e gas aki bay produci. Esaki ta e negoshi redondo, of rondo, cu esnan cu ta “putri te den nan higra” ta hunga riba custiya di nos pueblo.

UPP ta na fabor di un solucion serio y duradero cu ta bay sam sam cu bienestar di e pueblo di Parkietenbos, nos medio ambiente, nos pueblo en general y di e compania Serlimar. Pero laga esaki “bloed dood” y cu despues lo por tin mas concecuencia pa nos pueblo, no ta e solucion. Y UPP ta convenci cu loke ta wordo haci na e momentonan aki, esta tur e maniobra y patrañanan, ta pa caba cu Serlimar y su trahadornan. Y pueblo di Aruba ta esun cu lo bay sufri di esaki, djis pa por complace esnan cu nan unico afan ta pa gana placa. Aruba Quo Vadis?

 

 

1 di december 2016

 

Booshi Wever

Lider UPP

Brazil 163

  • Opinion: Un sistema di control fracasa

    Opinion: Un sistema di control fracasa

    Pa Armand Hessels

  • Opinion: Mi yui Po Sing Fan ta innocente

    Opinion:  Mi yui Po Sing Fan ta innocente

    Apreciabel sr Redactor. Na prome lugar mi ta grandicibo pa e espacio pa mi como mama di mi yui, Po Sing, por expresa mi mes tocante e caso di mi yui. Cu awa na wowo y un dolor inmenso mi a scucha con Juez den e caso di wayaca a sentencia mi yui na 20 anja di castigo di prizon. Ami como mama di mi yui sa cu mi yui ta innocente di tur e acusacion nan menciona. Na e inicio di e investigacion hopi cos a bai robez y mi ta di opinion cu esnan envolvi a busca y hasi envistigacion robez. No ta pasobra mi yui a duna Echabardo un lift y buske bek e mester tabata sa di e suceso aki. Pasobra ta hopi biaha mi yui sa duna Echebardo un lift y hopi otro hende mas hende den su bida. Esaki tabata algo comun pa mi yui. No ta paso mi yui a huur un auto pa Echebardo, kiermen cu mi yui tabata sa kiko e persona aki tabata di bai hasi pa cu e caso aki. Es mas e sa huur auto varios biaha pa Echebardo den pasado y sa huur pa otro hende tambe. Mi yui ta un persona cu semper a saka un man pa juda hende ora e por. Mi ta sinti cu husticia di Aruba cu tur respet, a faya y kier culpa mi yui pa sconde e berdad mes. Sra Juez, bin splica ami y mi famia, con por ta posibel cu mi yui tin tur cos den su bida, su mesun negoshi, su mesun plaka, su dos cas nan y mucho mas, kiko lo tabata su motibo pa laga comete un atraco sabiendo cu e tin tur cos y no falta nada. Nos por a scucha den corte con Echebardo a tilda e yui di e defunto y ningun musca a bula. Asina tin hopi cos bisa den corte cu no a sali den prensa y tambe cu no ta cuadra cu e realidad. Nos ta di opinion cu Sra Juez a wordu mal informa door di autoridadnan y e Fiscal concerni. Lamentablemente Echebardo a compromete su mes pa no a papia e berdad den corte. Por ultimo mi kier a remarka cu tin un diferencia grandi entre mi yui y e otro nan. Mi yui semper ta responsabel riba su mes y nunca a depende di su mama of tata. Pero e otro nan si. Nunca nos a laga sa cu nos no ta confia nos yui cu plaka. Por lo pronto te aki nan. Famia Fan.

  • Opinion: PA INTERES GENERAL!?

    Opinion: PA INTERES GENERAL!?

    pa Armand Hessels

  • Opinion: UN RST AUTONOMO?!

    Opinion: UN RST AUTONOMO?!

    Pa Armand Hessels

  • Opinion: Humilde

    Opinion: Humilde

    (PA ARMAND HESSELS)

  • Opinion: Secuencia robes

    Opinion: Secuencia robes

    SECUENCIA ROBES pa Armand Hessels

  • Powered by SETAR