Diasabra tin vuelo inaugural aerolinea Wingo

ORANJESTAD - Preparacionnan ta andando na Aruba Airport Authority N.V. pa diasabra awor ricibi e vuelo inaugural di Wingo for di Bogota, Colombia pa Aruba. Ta spera e prome vuelo di e aerolinea pa 4:05 pm, unda lo tin e saludo tradicional cu e cayon di awa di trucknan di Cuerpo di Bombero riba pista, pa despues e avion para na su puesto asigna.

E aerolinea WINGO ta nobo, apenas a start operacion dia 1 di december ultimo, bulando cu 4 avion Boeing 737-700 cu capacidad di 142 pasahero for di El Dorado International Airport na Bogota, Colombia. Nan a anuncia mesora vuelonan pa Aruba, 2 bes pa siman y varios destinacion den Colombia mes, Costa Rica, Cuba, Republica Dominicana, Ecuador, Guatemala, Mexico, Panama y Venezuela.

E siman aki a start cu promocion den medionan di comunicacion Colombiano, den cual ta promove "Un paraiso en el Caribe que esta mas cerca con los Cool Prices".  

WINGO ta parti di Copa Airlines Colombia cu tin como doño e compania Copa Holdings S.A. di Panama. A funda WINGO dia 20 di october 2016 y lo opera como un unidad di Copa Airlines Colombia, cu un structura completamente autonomo den comercialisacion, sistema di distribucion y servicio na cliente.