Dos homber arma a atraca trahadonan di Gem Stones

ORANJESTAD - Dos persona arma a atraca e joyeria Gem Stones banda di Brickel Bay diaranson anochi. E prome melding tabata cu dos sospechoso tabata na e sitio cu arma. Nan tabata completamente bisti na preto y uno tabatin un carson largo blanco. Ambos tabata bisti cu helm preto grandi. Nan a logra bay cu hopi cadena di oro.  

DESCRIPCION DI E CASO

Un di e trahadonan di e joyeria a splica polis cu e tabata pafo di e localidad cu su yiu muher. Dado momento dos homber a bin riba dje cu un arma. Un di nan a gara e trahado y push'e den e joyeria. Seguidamente a ordena e homber pa bay drumi riba vloer, mientras cu e tabata dirigi e arma den su direccion. E otro homber a drenta e negoshi cu un rugtas, habri e cashi di showroom y cuminsa coy tur e cadenanan di oro. E otro homber tabata menasa tur hende cu su arma mientrastanto. Ambos homber tabata bisti cu tshirt manga largo preto. Debi cu ambos tabatin helm bisti, por a mira solamente parti di nan wowo. Nan a cana bay direccion Brickel Bay y a huy riba un motorcicle den direccion pariba. NOTA. foto ta uno generico y no di e sitio di ayera.