Hues ta dicidi diabierna si Orozco por bandona Aruba

ORANJESTAD - Diabierna hues ta dicta riba e caso sumario cu Daniel Orozco (representante di Señor Frog's) a inicia contra pais Aruba. Aki lo dicidi si Orozco mester permanece na Aruba of cu e prohibicion di biahe ta wordo lanta. Abogado pa Orozco, Joselin Croes a prefera di no duna comentario ainda sino te diabierna. Mientrastanto e vocero pa e trahadonan, Starr Ramos ta sigui para ariba cu nan preferencia ta pa Orozco keda Aruba pa asina tin mas chens cu por forsa e compania pa cumpli cu pagonan pendiente. Sin Orozco, Ramos ta teme cu esaki no ta bay logra. 

MIEDO DI TRAHADONAN

Segun Ramos, a pidi pa un declaracion por escrito cu ta bisa cu e compania 'ta sigui paga te ora cu e faillisement ta final'. "Ainda (Joselin Croes) no a duna nos (e declaracion ey)" Ramos a bisa. Tambe a priminti cu e director ta bay bin, pero tampoco no a sosode ainda. "Nos tin miedo cu Daniel mag di bay, nos nunca ta bay ni wak ni haya niun hende mas (di e compania pa para responsabel)" Ramos a finalisa bisando. E caso a tuma lugar diaranson atardi 3'or.