Tjin_Asjoe: Tiara Air debe ATA e 1 miyon dollar fia ainda

ORANJESTAD - Un di e companianan afecta pa e bancarota di Tiara Air ta Aruba Tourism Authority. Tiara a haya un suma cuantioso di placa - 1 miyon dollar - fia di ATA algun aña atras cu aprobacion di Parlamento, pa yuda nan den nan situacion financiero debi na problema cu Venezuela. Sinembargo nunca Tiara no a paga esaki bek, y tampoco a cumpli cu e pago di impuesto extra pa cada pasahero. E suma cu e aeroliña a fia, tabata alrededor di 1 miyon florin. CEO di ATA, Ronella Tjin Asjoe a confirma cu ATA ta purbando ketobay di colecta e placanan aki awor. 

ACUERDO NO CUMPLI

Tjin Asjoe ta mustra cu tabatin un acuerdo cu Tiara no a cumpli cu ne. Simplemente e compania aereo no tabata den e posicion pa cumpli cu e acuerdo. Entre e acuerdo, ATA lo a haya tickets, asistencia pa cumpli cu e funcion pa mercadea Aruba pa medio di Tiara. E montante cu a wordo aproba unanime pues no a wordo paga bek nunca mas. Tambe tin e travel promotion levy cu ta un impuesto cu ta cobra pasaheronan (introduci na 2012) cu ta otro debe habri di Tiara na ATA. ATA ta parti di e proceso y ta riba e lista di creditornan cu mester haya placa di e aeroliña, como un di e instancianan primario pa cual tin debe. "Nos tin tur comprension pa e compania, y empleadonan. Pero nos ta maneha ATA na un manera profesional y responsabel" Tjin Asjoe a bisa. A mustra tambe mesora cu ora cu e peticion a bin pa ATA fia e placa, a respeta e desicion unanime di Parlamento, aunke cu ATA no tabata di acuerdo cu esaki segun e CEO. "Na final di dia a respeta e desicion y e puntonan cu a wordo treci dilanti. Y nos ta para pa esey tambe. "Pero enberdad nos ta keda riba e proceso" Tjin Asjoe a sigui bisa.